Treystum við svona fólki?

Ég ætla ekki að hafa mörg orð um fréttina sem fylgir hér að neðan. Ég verð að viðurkenna að mér krossbrá. Samt kom fréttin mér ekki á óvart, ég var full tortryggni fyrir. Mútur, umhverfisspjöll og rausnarlegar þóknanir. Ekki fylgdi sögunni hverjar heimildir fréttastofunnar eru en gera verður ráð fyrir að þær séu traustar. Fréttin birtist á Stöð 2 laugardagskvöldið 22. mars 2008.

Þetta er fyrirtækið sem rekur álverið á Reyðarfirði og vill reisa álver á Bakka við Húsavík. Annað alþjóðlegt fyrirtæki vill reisa álver í Helguvík og aðstandendur hugmyndarinnar um olíuhreinsistöð á Vestfjörðum segja rússneska og bandaríska aðila á bak við sig en neita að gefa upp hverjir þeir eru.

Eru Íslendingar tilbúnir til að treysta svona fólki og þeim sem makka með því fyrir landinu sínu, framtíð sinni, barnanna sinna og barnabarna - og ómetanlegri náttúru Íslands?
Ekki ég!

 

Athugasemdir

[Steingrímur Helgason, 24.3.2008 kl. 00:58]

Hmm, það er ekkert gaman að rífast við þig nema náttúrlega um fótbolta.   Ég er að verða ein væn Jennýzk vinstri væn femýnizdabelja hérna á blogginu með þessu sífellda samsinni hérna á síðunni þinni.

Farðu nú að blogga frekar sjálf um fótbolta frekar en að vera alltaf í Önnu skjóli, svo að ég nái upp einhverju 'testrógeni' til þrætuefna á þinni síðu.

Flottir pistlar hjá þér, svarar vel fyrir þig í athugasemdum, & fín eftirfylgni.

[Jóhann (IP-tala skráð) 24.3.2008 kl. 01:01]

Hvað með embættismenn hér?

Eða kannski þarf Alcoa ekki einu sinni að taka upp tékkheftið þar sem þeir virðast vera með íslensk stjórnvöld í rassvasanum.

Tek undir með þér Lára.

Íslenskir ráðamenn eru aumkunarverðir.

[Lára Hanna Einarsdóttir, 24.3.2008 kl. 02:14]

Jóhann Örn... ég veit þetta með Kárahnjúkavirkjun OG Impregilo OG íslensk stjórnvöld. Einmitt þess vegna treysti ég þeim alls ekki fyrir mér, mínum og landinu mínu.

Zteingrímur minn - mér þykir vænt um samsinni þitt því ég veit sem er að þú segir skoðun þína umbúðalaust þótt þú sért ósammála. Og boltinn... mér finnst hann einhvern vegin bara eiga heima á Önnu síðu. Og þinni og Magnúsar Geirs og Bratts núna. Maður rífur ekki boltann upp með rótum frá heimkynnum sínum, eða hvað?

Já, Jóhann... íslenskir ráðamenn ERU aumkvunarverðir. Það er alveg rétt hjá þér.

[Lilja Guðrún Þorvaldsdóttir, 24.3.2008 kl. 04:27]

Takk fyrir þennan pistil Lára Hanna, ég missti af fréttum þetta kvöld.  Tek undir áhyggjur ykkar Jóhanns Arnar af Íslenskum ráðamönnum.

[Heidi Strand, 24.3.2008 kl. 08:49]

Takk fyrir að vekja athygli á þessu, Lára Hanna.
Gott að við eigum fréttastofu eins og á Stöð tvö sem stendur fréttavaktina.

Við getum því miður ekki treyst þessu framkvæmdafólki og alls ekki eftir Kárahnjúkavirkjun.
Það voru takmarkaðar upplýsingar og fréttaflutningur  til þjóðarinnar þegar Kárahnjúkadæmið var í ferli. Framkvæmdir voru löngu hafnar þegar allar samþykktir lágu fyrir. (Ég fylgdist með þessu frá degi til dags á sínum tima.)
Bygging Kárahnjúkavirkjunar hefur bein áhrif á ástandið á fjármálamarkaðnum nú? Þessu var spáð þegar virkjunin var í undirbúningi.

[bumba (IP-tala skráð) 24.3.2008 kl. 10:08]

Gleðilega páska. Einu gleymum við, kusum við ekki þetta horngrýtis pakk? Þessa horngrýtis ráðamenn? Er ansi hræddur um það að við höfum gert það. Það sem verra er þó að stjórnarandstaðan i íslenzkum stjórnmálum er svo léleg að það hálfa gæti verið nóg. Hún er búin að vera afleit í tugi ára. Góðum meirihluta stjórnar VEL FUNGERANDI STJÓRNARANDSTAÐA. En Stjórnarandstaðan á Íslandi er eins og meirilhlutinn, hugsar bara um eigið skinn. Ömurlegt. Ég held því miður Lára Hanna að þetta sé bara byrjunin. Margt miklu meira á eftir að koma í ljós. Og hvert fer svo allt þetta ál, allt þetta stál, járn og nefndu það, í hvaða iðnað? Í bíla iðnað eða álpappír?Ó nei, það fer beint í vopnaiðnaðinn. Og það vita allir en enginn segir neitt. "Sköffum bara orkuna" segir landinn,ráðamenn, meira getum við ekki gert. Bleh. Með beztu kveðju.

[Óskar Þorkelsson, 24.3.2008 kl. 11:28]

Ég tel að málflutningur minn hér og annarstaðar á blogginu hafi sýnt að ég treysti ekki íslenskum ráðamönnum, stofnunum eða lögreglu... Framferði þeirra í gegnum sl áratugi gefa enga ástæðu til þess.

Ég var skammaður í gær fyrir að skrifa um boltann :)

[Jenný Anna Baldursdóttir, 24.3.2008 kl. 12:03]

Af hverju er ég ekki hissa?  Andskotans spillingarfrömuðir. 

Takk fyrir mig.

[Pálmi Gunnarsson, 24.3.2008 kl. 12:32]

 Göngum yfir brúna

Sagt er að sumir vilji verksmiðjur
út við sérhvern tanga og fjörð.
Sagt er að aðrir vilji stóriðju
út um sína fósturjörð.

Göngum yfir brúna
milli lífs og dauða,
gín á báðar hendur
gjáin dauðadjúpa

Landið okkar sem var laust við skít
verður leigt gegn gulli í hönd.
Af græðgi gerumst við svo einskisnýt
að okkur gleypa önnur lönd.

Göngum yfir brúna...

Af öllu sem við gerum rangt og rétt
við reyndar lærum aldrei neitt.
Og eftir dauðann hef ég nýskeð frétt
að aurum enginn geti eytt.

[Ragnheiður Ólafía Davíðsdóttir, 24.3.2008 kl. 12:38]

Það er orðið nokkuð langt síðan þessi texti var saminn. Höfundurinn (veit ekki hvort það er Pálmi eða Magnús) hefur séð fram í tímann. Svo mikið er víst. Hafðu þökk fyrir færsluna Lára Hanna og takk fyrir að birta þennan texta, Pálmi. Þörf áminning.

[Níels A. Ársælsson., 24.3.2008 kl. 14:12]

Kemur ekki á óvart.

[Pálmi Gunnarsson, 24.3.2008 kl. 14:19]

Textinn og lagið er eftir Magga E, Mannakorn fluttu þetta á sínum fyrsta diski en lagið hefur síðan verið nokkurskonar einkennislag hljómsveitarinnar og er alltaf flutt á tónleikum með viðeigandi ræðuhöldum. Við erum tilbúin að fórna dýrmætu landi sem aldrei verður endurheimt fyrir gull í hönd frá vafasömum fyrirtækjum. „money talks, shit walks“

[Örn Jónasson (IP-tala skráð) 24.3.2008 kl. 14:31]

Ha, ha, ha, - þið ruglið saman Impregilo og ALCOA  - sýnir bara hvað þið eruð lítið inn í þessum málum þarna fyrir austan enda flest ykkar af Höfuðborgarsvæðinu

Impregila byggði Kárahnjúkavirkjun sem er EKKI á vegum ALCOA - Bechtel byggði álverið fyrir austan.

Ég er viss um að fréttin sem þið eruð að myndast við að fjalla um hafi verið pöntuð enda var það einungis Stöð 2 sem var með hana og engra heimilda er getið!

Þetta var náttúrulega kærkomin frétt fyrir andstæðinga Kárahnjúkavirkjunarinnar og álversins á Reyðarfirði og atvinnuuppbyggingar þar - sannkölluð Þórðargleði.

Ég spyr bara, hvað hefuð þið viljað gera fyrir allt verkafólkið á Austfjörðum sem misst hefur vinnuna á undanförnum árum vegna aflaniðurskurðar stjórnvalda og aflabrests sem leitt hefur til lokana fjölmargra fiskvinnslufyrirtækja?

Eruð þið með hugmyndir að fyrirtækjum sem veita 400 manns vinnu, og þar að auki leiða af sér ca. 1.000 önnur störf?

Eruð þið með hugmynd að fyrirtæki sem veltir 90.000.000.000 (90 mia.kr.) á ári eins og ALCO Fjarðarál gerir? - og mun gera næstu 50 árin.  

Hafið þið hugmyndir að störfum þar sem að meðallaunin eru 4,7 mio.kr. ári?? - fyrir utan hlunnindi eins og íþróttastyrkur, fríar ferðir til og frá vinnu, ókeypis fæði á staðnum ???

Hættið að svekkja ykkur út af Kárahnjúkum og álverinu á Reyðarfirði.  Svekkið ykkur frekar út af allri stóriðjuuppbyggingunni á Suðversturhorninu þar sem að flest ykkar búa núna.  Kárahnjúkar og Reyðarfjörður er langt frá þeim stað sem þið búið lang flest ykkar.

Fréttin sem þið hafið tekið fegins hendi er tilbúningur til þess að leiða hugan frá bágu efnahagsástandi hér á landi og annarri óáran, mannréttindabrotum í Kína og hörmungunum í Darfur.

[Lára Hanna Einarsdóttir, 24.3.2008 kl. 15:36]

Kærar þakkir fyrir að minna okkur á þetta ágæta lag, Pálmi. 

Ég sá áðan að þú hafðir lesið hug minn og sett það í tónlistarspilarann hjá þér. Hvet alla til að líta inn til Pálma og hlusta á það hér - svartur kassi ofarlega vinstra megin á síðunni, smella á "play" örina lengst til vinstri í kassanum.

[Jóna Benediktsdóttir (IP-tala skráð) 24.3.2008 kl. 15:59]

Því miður er meginþorrra landsmanna alveg sama um hverjir eru góðu gæjarnir og hverjir eru þeir vondu í þessum málum eins og flestum öðrum.  Það er mikið auðveldara að loka bara augunum og telja peningana í kassanum blindandi á meðan þeir koma inn, sama hvaðan þeir koma, þegar streymið minnkar eða stoppar er svo alveg ljóst að þeir sem voru að telja bera ekki skarðan hlut frá borði og þurfa því síður að sæta afleiðingum gjörða sinna. 

[Jón Aðalsteinn Jónsson, 24.3.2008 kl. 17:35]

Þetta er góð frétt þó hún sé nokkurn vegin eingöngu um ætluð brot og rannsóknir sem á að setja í gang, fréttin sýnir að önnur lönd veita fyrirtækjum aðhald sem virðist ekki lenskan hér hvorki hjá ríki né fréttastofum. Hvers vegna eyðir stöð tvö ekki smá tíma í að rekja og upplýsa hverjir felldu gengið og í hvaða tilgangi? Mér finnst það öllu meira aðkallandi mál sem að snertir allan Íslenskan almúga og innflutt vinnuafl líka en kannski er það eitt af málunum sem ekki má minnast á og þá gott að geta grafið upp fréttir sem að afvegaleiða hjörðina smávegis meðan að málin eru kláruð. Þið hafið gert ykkur grein fyrir því að þeir sem að stóðu fyrir gengishoppinu rýrðu kjör erlendra verkamanna hér sem senda kaupið sitt heim um 20% á örfáum dögum. Og ekki kenna virkjunum eða álverum um fallið. Davið Oddson Seðlabankastjór sagði í Fréttalaðinu að þarna væri eingöngu um að ræða breytingar vegna aðgerða innlendra aðila. Það mætti kannski skoða hverjir stóðu að þessu hruni aðeins betur en kannski má ekki fjalla um þessi mál af óútskýrðum ástæðum. Kannski fjarmagn komi við sögu, eða eignarhald ekki veit ég en það er mín skoðun að atburðarrás síðustu viku ætti þegar að liggja ljós fyrir vel útskýrð af frétta miðlum svo að almúginn sé upplýstur um hvað gekk á og ljóst sé að ekki voru lög brotinn. Að mínu mati alveg eins áríðandi frétt og ætlaðar mútur í Barein.

[Guðbjörn Jónsson, 24.3.2008 kl. 17:42]

Takk fyrir góðan pistil Lára Hanna.  Og takk fyrir góðar umræður; sérstaklega til Pálma fyrir að minna á þeirra frábæra lag og texta.

Einn er þó í þessum hópi sem sker sig úr, en það er Örn Jónasson. Stundum getur verið gott að þegja, því þá komast færri að því hve lítið vit er í því sem hugsað er.

Yfir 80% vinnuafls við Kárahnjúka munu hafa verið erlent vinnuafl og enn er óljóst hve margir þeirra greiddu engin gjöld til ríkisins en ollu t. d. auknum útgjöldum við heilsugæslu og lögæslu.

Innlent vinnuafl var því u. þ. b. 20% mannaflans og stór hluti þess fjölda var frá öðrum stöðum á landinu en frá Austfjörðum.

Þá er spurningin:  Hefðum við geta skaffað þessu fólk ásættanleg störf með minni tilkostnaði en þarna var gert?  Ég er á því enda benti ég á slíkar leiðir áður en farið var í þetta ævintýri.

Það á algjörlega eftir að koma reynsla á hvort vinnuafl fæst í öll þessi störf sem Álverið er sagt skapa. Nú þegar er farið að tala um að fólk þarna fyrir Austan sæki ekki í þessi störf. Mikill tilflutningur á fólki kostar þjóðfélagið umtalsverða fjármuni, sem við hvorki eigum til núna, eða eigum auðvelt með að fá lánaða í útlöndum, vegna eigin eyðslusemi og vantrausts sem forystumenn okkar hafa skapað. Ég sé fyrir mér að stærð Álversins geti orðið verulegt vandamál á mörgum sviðum, m. a. varðandi mannafla.

Örn talar um að velta álversins verði 90 milljarðar króna. Þessi fullyrðing sýnir okkur að hann hefur enga hugsun á því sem hann er að segja, því öll velta álversins er í USA Dollurum og Íslensk velta þess verður einungis það sem fer til launagreiðslu og til greiðslu fyrir aðkeypta þjónustu Íslenskra fyrirtækja. Rafmagnið verður að sjálfsögðu greitt með dollurum því Landsvirkjun er með erlend lán fyrir framkvæmdinni.  Þá má einnig geta þess að Alcoa er þekkt fyrir að verðleggja súrálið hátt, enda eru þeir að kaupa hráefnið til álversins í Reyðarfirði af sjálfum sér.  Eins og annars staðr munu þeir gæta þess að verðlag súrálsins verði þannig að rekstrarhagnaður verði lítill sem enginn, þannig að það þurfi litla skatta að greiða til ríkisins.

Auk þess má geta þess að félagið sem hér var stofnað til að reka álverið í Reyðarfirði er alfarið í eigu Alcoa, þannig að enginn Íslendingur kemur til með að hljóta arð frá starfseminni. Hann mun allur fara til eigendanna.

Þegar allt þetta er skoðað af raunsæi, virðist augljóst að það hefði verið þjóðhagslega hagstæðara að fara í framkvæmdir fyrir Austan sem kostað hefðu 20 - 25% af Kárahnjúka og álversævintýrinu, sem líklega hefði skilað þjóðfélagi okkar heldur meiri rauntekjum en álverið mun gera.

Héðan af getum við einungis vonað það besta en ég sé ekki mikla gullstafla meðfram veginum næstu árin. 

[Sigurður Jónsson (IP-tala skráð) 24.3.2008 kl. 18:34]

Þetta er aumkanarverð frétt hjá Stöð 2; er greinilega skrifuð af óheiðarlegum álversandstæðingi, því þarna er ýmislegt týnt til í einn pakka aðeins í þeim tilgangi að sverta Alcoa.

Fréttamaðurinn hefði t.d. getað látið þess getið að á sumum menningarsvæðum, eins og t.d. fyrir botni Miðjarðarhafsins, eru embættis- og stjórnmálamenn mjög spilltir og hleypa engu í gegn nema gegn greiðslum í eiginn vasa.    Þá hefði fréttamaðurinn getað bent á að þóknun bankastjórans er ekkert ýkja mikil ef borið er saman við önnur fyrirtæki, t.d. Kaupþing.   

Stóra spurningin hér er hvor er óheiðarlegri, fréttamaðurinn sem skrifaði þessa "hálfsannleiks" frétt eða forstjóri Alcoa, sem reynt var að koma höggi á?  Dæmi hver fyrir sig.

[Ásgeir Kristinn Lárusson, 24.3.2008 kl. 19:53]

Já- hvað skal segja? Svo illa gefinn er ég og vitlaus, að ég treysti hvorki ráðamönnum okkar né viðsemjendum þeirra, álrisunum, til að sjá hag þessarar þjóðar sem best borgið. Ég er líka svo tregur, að ég ímynda mér, að búið sé að handsala bak við tjöldin, álver á Bakka og í Helguvík, og það hafi verið frágengið fyrir löngu síðan. Einnig held ég, í fávisku minni, að gengi krónunnar verði látið falla um 5-6% næstu daga og í byrjun aprílmánaðar muni Sameinaðir Bankar allra Landsmanna sýna gríðarlegan gengishagnað í uppgjörum sínum. Það verður ekkert aprílgabb þar! En hvað veit ég, aumur og fávís Stórreykjavíkursvæðisíbúinn?

[Pálmi Gunnarsson, 24.3.2008 kl. 23:15]

Auðvitað er búið að ganga frá þessu öllu ... það er auðvelt því ráðamenn álíta sem svo að þó að einhverjir náttúruemjarar mótmæli og kæri sé það varla til að missa svefn yfir. Því miður fyrir flest okkar sem búum á þessu oggupínulitla landi þá anga flest þessi mál ver en illa verkuð hákarlsbeita. Hinsvegar fer Jóakim frændi að mæta á svæði til að taka yfir og þá held ég nú fyrst að verði fjör í penthúsinu.

[Jens Guð, 25.3.2008 kl. 00:29]

  Þessi fyrirtæki (Alcao og Imprigilo) eru glæpafyrirtæki sem svífast einskis.  Ég vann í álverinu í Straumsvík 1973 - 1976.  Þar kynntist ég því hvað markmið og viðhorf svona fyrirtækja eru allt önnur en þau sem við eigum að venjast í okkar litla samfélegi þar sem allir þekkja alla og allir bera hag allra fyrir brjósti.

  Þó að ég hafi verið villtari unglingur en ég vil kannast við í dag þá er ég nokkuð sáttur við það í dag að hafa viljandi keyrt á dráttarvél á útlendu toppana hjá álverinu þannig að þeir ultu út um allt og misstu af sér bláu yfirstéttarhjálmana.  Ég stal þá einum slíkum og lenti í smá veseni út af því.  En notaði blá hjálminn sem ég stal síðar til að gera ýmislegt sprell.

  Sönglagið sem Pálmi vitnar til hefur mér síðan orðið stærri sannleikur en mig óraði fyrir þegar það kom út um miðjan áttunda áratuginn.  Mér þótti það að vísu verulega flott lag þegar það kom út en hugsaði ekki út í textann.  Ennþá síður grunaði mig að þetta frábæra sönglag ætti ennþá brýnna erindi við okkur í dag en þegar það kom út. 

  Ég hvet ykkur til að tékka á þessu lagi í tónspilaranum á www.palmig.blog.is.   

[Theódór Norðkvist, 25.3.2008 kl. 10:10]

Þetta er skuggalegt og kemur ekki á óvart miðað við Impregilo dæmið, en ítalska fyrirtækið var kært fyrir mútur í Burgundi, þar sem mútur eru nánast viðurkennd stjórnunaraðferð.

PS Í boði hverra ætli Kryddsíldin verði á næsta ári?

[Magnús Geir Guðmundsson, 25.3.2008 kl. 21:49]

Lára Hanna, kona keik,

kröftug veður eld og reyk.

Stílvopni í stríðsins leik,

stöðugt beitir, hvergi smeyk!

Áfram stelpa!

[Lára Hanna Einarsdóttir, 26.3.2008 kl. 01:30]

Ég sé á athugasemdunum að þessi frétt kom fæstum á óvart frekar en mér. Þetta er eitthvað sem er vitað en ljótt þykir mér ef satt reynist að búið sé að handsala Helguvík og Bakka fyrirfram - áður en neitt er tilbúið, samþykkt eða frágengið.

Við erum undarleg, Íslendingar. Við látum stjórnvöld og embættismenn vaða yfir okkur á skítugum skónum æ ofan í æ, emjum, vælum og grenjum af sársauka og niðurlægingu - en svo hvarflar ekki að fólki að refsa þeim fyrir það þegar tækifæri gefst - í kosningum. Og siðferðisvitundin er svo brengluð hjá okkur að við gerum lítið annað en að tauta í barminn þegar spillinginn og siðleysið ætlar um koll að keyra. Engum dettur í hug að segja af sér embættum og svo er þetta sama lið bara kosið aftur næst!

Ég má til með að benda Erni Jónassyni á að enginn er að rugla saman Impregilo, Alcoa og Bechtel. Það er hins vegar verið að bera saman þessi fyrirtæki, líkja þeim saman jafnvel - og alls ekki að ástæðulausu. Og ekki verð ég vör við neina Þórðargleði yfir fréttinni. Miklu frekar depurð. Þetta er sorglegt mál og óskemmtilegt, en staðreynd engu að síður sem ekki er nokkur leið að loka augunum fyrir. Auðvitað er fréttin ekki tilbúningur, Örn. Ég skil ekki hvernig þér dettur það í hug. Fréttastofur búa ekki til fréttir - þær flytja þær. Ef það hefur farið fram hjá þér hefur mikið verið fjallað um stóriðju á suðvesturhorninu, bæði á þessari bloggsíðu og öðrum.

Tek undir með Jóni Aðalsteini - ég vil gjarnan fá fréttaflutning um hverjir felldu gengið, orsakir og afleiðingar. Sprottið hafa upp spámenn um víðan völl sem allir þykjast hafa höndlað sannleikann um málið en tala út og suður svo maður er engu nær.

Guðbjörn kemur með marga góða punkta í sinni athugasemd, t.d. hlutfall mannaflans fyrir austan, tilkostnað starfanna þar og fyrirsjáanlegan skort á mannafla - þrátt fyrir allt.

Ég botna ekkert í athugasemd Sigurðar Jónssonar

[Lára Hanna Einarsdóttir, 26.3.2008 kl. 01:35]

Æ, þarna varð smá smellislys... held bara áfram:

Ég botna ekkert í athugasemd Sigurðar Jónssonar og get því fáu svarað honum, því miður. Í fréttinni var enginn hálfsannleikur heldur var þar fjallað um staðreyndir, rannsóknir sem fram fara af mútum, óeðlilega háum þóknunum og meintum umhverfisspjöllum Alcoa. Af hverju í ósköpunum ætti ekki að fjalla um slíkt í ljósi þess að þetta fyrirtæki er að ryðjast inn á íslenskan atvinnumarkað með mengandi stóriðju sem krefst virkjana sem leggja náttúruna í rúst?

Skondin saga hjá Jens... ég trúi þessu alveg upp á hann.

Og Magnús minn Geir... þú ert krútt mánaðarins. Takk fyrir vísuna.

Þessi færsla og athugasemd var að minnsta kosti ekki í boði Alcoa eða Impregilo, Theódór... 

[Örn Jónasson (IP-tala skráð) 26.3.2008 kl. 14:50]

Guðbjörn, þakkar þér fyrir "sneiðina".  Þú ert ekkert þess umkominn að segja öðrum að þegja og brigsla mönnum um fávisku eins og þeirri athugasemd sem þú sendir mér hér að ofan.  Þú gerir þér a.m.k. ekki grein fyrir eftirfarandi:

• Starfsemi ALCOA á Reyðarfirði getur af sér virðisaukandi starfsemi á Austurlandi
• Skatttekjur starfsfólks ALCOA eru miklar í samanburði við stærð samfélagsins fyrir austan
• Þó svo að ALCOA sé dótturfyrirtæki þess er sumir kalla erlendan auðhring, þarf það að greiða ýmiskonar opinber gjöld til samfélagsins, og sum þessara gjalda eru veltutengd.  (Auðvitað veit ég að ALCOA spýtir ekki inn 90 mia.kr. á ári inn í Íslenskt samfélag, þó þú gefir annað til kynna í virðingar- og þekkingarleysi á skoðunum annarra).
• Íslenska ríkið (les almenningur) lagði ekki til fé til framkvæmdanna, heldur ALCOA og Landsvirkjun sem reyndar lánaði fyrir framkvæmdunum og greiðir lánið til baka með tekju af orkusölu frá Kárahnjúkum.
• Arðsemi Kárahnjúkavirkjunarinnar er meir en vísustu menn hafa viljað vera láta.
• Orkuframleiðsla Kárahnjúkavirkjunarinna er 30% meiri en reiknað var með, eða hátt í 900 Mw.
• Stærð álversins fyrir austan er ekki vandamál, þó svo að Guðbjörn segist "hafa heyrt að erfiðlega hafi gengið að ráða fólk í það" - þvert á móti hafa umsóknir um störf þar verið umfram væntingar - sérstakelga eftir að mörg fyrirtæki í fiskvinnslu urðu að loka þar.
• Kostnaður við aðflutnings fólk til Austurlands er síst minnis en tilstraumur fólks til Höfuðborgarsvæðisins.
• ALCOA leggur mikið fé til ýmiskonar samfélagslegra verkefna á Austurlandi, auk sjálfboðaliðsstarfa við ýmis góðgerðarmál á Austurlandi.
• Varla fer ALCOA að okra á sjálfu sér á súráli, það þarf jú að hafa upp í kostnað og skila hagnaði.
• Súrálskostnaður er 70% af kostnaði við álframleiðslu vegna þess hversu langt í virðiskeðjunni frá námigreftri það er.
• Að halda því fram að ALCOA skili litlu til Íslenskt samfélags er jafn fáránlegt og að segja að fyrirtæki eins og ACTAVIS skili engu til Íslensskt

Guðbjörn, þú ættir síst að segja öðru fólki að þegja og gefa í skyn að það sé heimskt sé það ekki sammála skoðunum þínum.  Mér finnst þú þess síst umkominn sbr. það sem þú setur frá þér á bloggsíðu þinni.  Þú virðist auk þess ekki hafa mikla þekkingu á starfsemi stórfyrirtækja á borð við ALCOA, né heldur á samfélaginu fyrir austan.  Ég hef heldur aldrei séð neitt af viti hjá þér varðandi það, hvað hefði átt að koma í staðinn fyrir álverið fyrir austan. 

Sigurður Jónsson;  þetta er allt hárrétt hjá þér!  Ekki orð um það meira.

Lára Hanna:  Afsakaðu, að ég skuli (mis)nota síðuna þína til að viðra mína sýn á þessum málum.  Ég efast ekki um að þú er hugsjónakona sem vill láta gott eitt af sér leiða.  En það sem ég og Sigurður Jónsson erum að sýna fram á er það að þar eru tvær hliðar á öllum málum og mér virðist ekki að mörg ykkar vilji samþykkja og sætta ykkar við það.

Eitt skal ég segja þér, að það var ekki getið neinna heimilda hjá Stöð 2 varðandi misbresti ALCOA.  Þar að auki var fréttin á æsifréttastíl.  Þessvegna ályktaði ég að fréttin hildir að miklu leiti að vera tilbúningur.  Það virðist vera að allt neikvætt um ALCOA sé tekið fegins hendi hér á landi og gerðar úr því stórfréttir.  Aldrei er talað jákvæðar hliðar á ALCOA eða það sem að það gerir gott.   Mér finnst andófið við stóriðjuframkvæmdum á Suð-Vesturhornini langt um máttminni heldur það sem átti sér stað fyrir og á meðan á framkvæmdnum fyrir austan stóð.  Hvar eru öll fjöldamótmælin núna??  Þetta andóf virðist vera meira til að sýnast.  Hinsvegar er strax farið að berjast gegn fyrirhuguðum frakvæmdum á Bakka við Húsavík. 

[Gunnar Th. Gunnarsson, 26.3.2008 kl. 18:22]

Ásakanirnar um mútur koma ekkert á óvart. Svona viðskiptaformúla er einmitt vandamálið í mörgum löndum. Ásakanir um umhverfissóðaskap Alcoa í USA kemur hins vegar á óvart, en ekki þegar skoðað er hverjir koma með ásakanirnar. Jú, nefnilega umhverfissamtök: Og í hvaða veröld eru þau trúverðug?

[Theódór Norðkvist, 26.3.2008 kl. 22:04]

Það var gott að heyra Lára. Kryddsíldin var í boði Alkans síðast, en er ekki búið að sameina Alkann Alkóu? Síðan bíður hið alræmda Rio Tinto átekta og ætlar sér að gleypa Alkanóa!

[Lára Hanna Einarsdóttir, 26.3.2008 kl. 23:58]

Ég ætlaði ekki að hafa mikið fleiri orð hér, en má til með að leiðrétta stórvægilegan misskilning Arnar Jónssonar sem segir: "Mér finnst andófið við stóriðjuframkvæmdum á Suð-Vesturhornini langt um máttminni heldur það sem átti sér stað fyrir og á meðan á framkvæmdnum fyrir austan stóð."

Þetta er fjarri sanni. Andófið við stóriðjuframkvæmdum hér á suðvesturhorninu er gríðarlegt. Harði diskurinn í tölvunni minni er að fyllast af blaðaúrklippum, fréttaupptökum og alls konar efni um það andóf og fór ég þó ekki að safna þessu saman fyrr en í nóvember sl. Sjálfsagt hefur líka allt mögulegt farið fram hjá mér. Kannski fer þetta andóf örlítið öðruvísi fram og hefst fyrr í ferlinu en þegar Kárahnjúkar voru í farvatninu og þá ber öðruvísi á þeim.

Ég gat þess í færslunni að ekki fylgdi sögunni hverjar heimildir fréttastofu Stöðvar 2 væru, en mér þykir rétt að álykta að sú fréttastofa eins og aðrar slíkar flytji fréttir en skáldi þær ekki.

[Villi Asgeirsson, 27.3.2008 kl. 22:08]

Soldið seint en svarið er auðvitað nei. Engum kemur þetta á óvart.