Áfangasigur og áskorun !!!

Skipulagsstofnun var að birta álit sitt á mati á umhverfisáhrifum Bitruvirkjunar og leggst afdráttarlaust og eindregið gegn byggingu hennar. Þetta eru kærkomin tíðindi - gríðarlega mikilvægur áfangasigur í baráttunni fyrir náttúruperlunni á Ölkelduhálsi og raunar öllu Hengilssvæðinu.

Þetta ferli er búið að standa lengi yfir. Hengilssíðan var sett upp í lok október sl. og fólk hvatt til að senda inn athugasemdir við mat á umhverfisáhrifum. Sett var Íslandsmet - aldrei áður höfðu borist eins margar athugasemdir við neinni framkvæmd í Íslandssögunni - en athugasemdirnar voru hátt í 700. Skipulagsstofnun flokkaði og taldi þær en sendi síðan til Orkuveitu Reykjavíkur, framkvæmdaraðilans. Upp úr miðjum mars sl. sendi OR síðan lokamatsskýrslu sína til Skipulagsstofnunar sem var að kveða upp álit sitt fyrir stundu.

Skjalið, þar sem Skipulagsstofnun færir rök fyrir áliti sínu er langt, 43 síður. Ég festi það við þessa færslu ásamt matsskýrslunni og umsögnum og athugasemdum sem bárust. Þessi skjöl er einnig hægt að nálgast á heimasíðu Skipulagsstofnunar - hér. Ég ætla aðeins að hafa hér eftir kaflann "Helstu niðurstöður" úr álitinu. Hann hljóðar svo (leturbreytingar mínar):

"Það er niðurstaða Skipulagsstofnunar að bygging Bitruvirkjunar sé ekki ásættanleg vegna verulegra neikvæðra og óafturkræfra áhrifa á landslag, útivist og ferðaþjónustu. Um er að ræða lítt snortið, fjölsótt útivistarsvæði í nágrenni þéttbýlis/höfuðborgarsvæðisins og býr svæðið yfir stórbrotnu landslagi sem m.a. einkennist af fjölbreyttri hveravirkni. Fyrirhuguð Bitruvirkjun myndi breyta landslagsásýnd þessa lítt raskaða svæðis í ásýnd iðnaðarsvæðis.

Skipulagsstofnun telur ljóst að upplifun ferðamanna innan áhrifasvæðis Bitruvirkjunar myndi gerbreytast þegar horft er til umfangs fyrirhugaðra framkvæmda og þeirra ásýndarbreytinga sem þær hefðu í för með sér. Stofnunin telur að í ljósi þess yrði ferðaþjónusta og útivist eins og hún er stunduð í dag samkvæmt framlögðum gögnum ekki lengur möguleg innan áhrifasvæðis virkjunarinnar. Stofnunin telur að ráða megi bæði af umfjöllun í matsskýrslu sem og í umsögnum og athugasemdum að um verði að ræða mikil neikvæð, óafturkræf og varanleg áhrif á ferðaþjónustu og almenna útivist vegna breyttrar ásýndar svæðisins og verulegs ónæðis af völdum hávaða bæði á framkvæmda- og rekstrartíma.

Stofnunin telur að ekki sé gerlegt að draga úr neikvæðum umhverfisáhrifum framkvæmdarinnar á framangreinda umhverfisþætti með mótvægisaðgerðum þannig að hún teljist ásættanleg.

Þá telur stofnunin ljóst að ef litið er til samlegðaráhrifa Bitruvirkjunar með núverandi virkjunum, háspennulínum og fyrirhugaðri virkjun við Hverahlíð á Hengilssvæðið í heild sinni, nái þessi áhrif á landslag, útivist og ferðaþjónustu til enn umfangsmeira svæðis og áhrifin verði að sama skapi umtalsvert meiri og neikvæðari. Skipulagsstofnun telur ljóst að með auknu raski á Hengilssvæðinu fari verndargildi lítt snortinna svæða þar vaxandi.

Varðandi áhrif Bitruvirkjunar á aðra umhverfisþætti þá liggur fyrir að mikil óvissa er um áhrif á jarðhitaauðlindina, áhrif á lofgæði ráðast alfarið af virkni hreinsibúnaðar fyrir brennisteinsvetni sem fyrirhugað er að koma upp og áhrif á grunnvatn ráðast af því að skiljuvatni verði veitt um fóðraðar niðurrennslisholur niður fyrir grunnvatnsborð.

Óvissa er um breytingar á yfirborðsvirkni á áhrifasvæði virkjunar á Bitru. Skipulagsstofnun telur að komi til aukinnar virkni geti það leitt til neikvæðra áhrifa á jarðmyndanir, örverulíf hvera, gróður og smádýralíf.

Reykjavík, 19. maí 2008"

Svei mér ef þetta er ekki næstum eins og afritað upp úr pistlunum mínum á þessu bloggi. Mikið svakalega erum við innilega sammála, Skipulagsstofnun og ég! Og álit þeirra er ekki á neinni tæpitungu - þar er fast að orði kveðið, það er ákveðið og afdráttarlaust.

En baráttunni er engan veginn lokið, athugið það. Í mínum huga hljóta næstu skref að vera þau, að Orkuveita Reykjavíkur hætti alfarið við að reisa Bitruvirkjun og að Sveitarfélagið Ölfus dragi breytingu á aðalskipulagi - þar sem breyta á Bitru/Ölkelduhálssvæðinu í iðnaðarhverfi - til baka. Síðan kæmi til kasta þar til bærra aðila að friðlýsa svæðið.

Það er ástæða til að óska Skipulagsstofnun og þjóðinni allri til hamingju. Það er líka ástæða til að þakka öllum þeim tæplega 700 sem sendu inn athugasemdir við mat á umhverfisáhrifum í haust. Við getum haft áhrif ef við tökum höndum saman og notum samtakamáttinn.

Takið þátt í áskorun á Orkuveitu Reykjavíkur og Sveitarfélagið Ölfus með því að setja inn athugasemd við þessa færslu! 

"Við skorum á Orkuveitu Reykjavíkur að hætta við að reisa Bitruvirkjun og Sveitarfélagið Ölfus að hætta við að breyta svæðinu í iðnaðarsvæði!"

Fréttir Ríkissjónvarpsins í kvöld

Skrár tengdar þessari bloggfærslu:

• Álit Skipulagsstofnunar á Bitruvirkjun
• Lokamatsskýrsla vegna Bitruvirkjunar
• Umsagnir og athugasemdir

Athugasemdir

[Bragi Ragnarsson, 19.5.2008 kl. 15:23]

Til hamingju Lára Hanna, þetta er glæsilegt.  Sérstaklega er uppörfandi að sjá að aðgerðirnar virðast hafa haft áhrif.  Tek undir áskorun til OR um að taka nú formlega ákvörðun um að hætta við Bitruvirkjun

[Sigurður Ingi Kristinsson, 19.5.2008 kl. 15:26]

Þetta eru frábærar fréttir. Ég skora líka á OR um að hætta algjörlega við Bitruvirkjun

[Rúnar Muccio (IP-tala skráð) 19.5.2008 kl. 15:39]

Til hamingju Lára Hanna. Þetta er frábært

[Haraldur Bjarnason, 19.5.2008 kl. 15:40]

Það sem mér finnst athyglisverðast við niðurstöðu Skipulagsstofnunar er hve afgerandi hún er. Þetta er skýrt frá hendi stofnunarinnar en ekki loðið og teygjanlegt, eins og oft vill verða, sérstaklega þegar orkufyrirtæki eiga hlut að máli. - Þarna áttu bræður í baráttunni Lára Hanna !!

[Óskar Þorkelsson, 19.5.2008 kl. 15:41]

glæsilegt :)   til hamingju Lára

[Ár & síð, 19.5.2008 kl. 15:46]

Það eru alltaf góðar fréttir þegar opinberri stofnun tekst í mikilvægri ákvörðun að vera sammála áhugafólki með hjartað á réttum stað! Til hamingju, Ísland! (Loksins átti þessi setning við).
Matthías

[Steingerður Steinarsdóttir, 19.5.2008 kl. 16:01]

Frábært. Þetta getur þú ekki hvað síst þakkað sjálfri þér Lára Hanna. Einstaklingar geta haft áhrif.

[Sævar Helgason, 19.5.2008 kl. 16:16]

Þetta er afgerandi niðurstaða hjá Skipulagsstofnun.  Vonandi þýðir þetta að þessi gullmoli sem Ölkelduháls er- fær frið til framtíðar.

[Valgerður Sigurðardóttir, 19.5.2008 kl. 16:16]

Til hamingju, æðislegar fréttir!

[Heiða B. Heiðars, 19.5.2008 kl. 16:19]

Til hamingju og takk fyrir mig!

[Armann Ægir (IP-tala skráð) 19.5.2008 kl. 16:19]

Frábær afmælisgjöf sem ég fæ í dag. Til hamingju Lára Hanna og þið öll.

Ég skora á OR að hætta alveg við Bitruvirkjun.

[Ólafur Ragnarsson, Hvarfi, 270 Mosfellsbæ (IP-tala skráð) 19.5.2008 kl. 16:43]

Frábært Lára Hanna, þetta er ekki einungis áfangasigur í þeirri baráttu að bjarga óafturkræfum náttúruperlum, heldur sýnir þetta okkur hinum að hver einstaklingur getur skipt sköpum.

Til hamingju og fingur í kross :)

[Jenný Anna Baldursdóttir, 19.5.2008 kl. 17:40]

Lára Hanna, þú ert frábær og það sem meira er nú er endurvakin trú mín á að grasrótin fái einhverju breytt.

Hipp, hipp, húrra

[Pálmi Gunnarsson, 19.5.2008 kl. 17:44]

Sannarlega stórfréttir og að sjáfsögðu gleðifréttir. Stórfréttir vegna þess að fram til þessa hafa orkufyrirtækin, ríkin í ríkinu fengið flestu því framgengt sem hugur hefur staðið til. Nú kveður við annan tón, vonandi er braskinu með dýrmæta náttúru Íslands lokið.

[Jón Steinar Ragnarsson, 19.5.2008 kl. 17:57]

Til Hamingju meðþett. Oft veltir lítil þúfa þungu hlassi. Þarna sésthve bloggið er þarfur miðill og vei þeim sem tala niðrandi um moggabloggara.  Assgoti er ég montinn af þér.

[Pétur Jóhannes Guðlaugsson (IP-tala skráð) 19.5.2008 kl. 18:01]

Frábær áfangasigur !

[MAGNUS FINNUR HAUKSSON (IP-tala skráð) 19.5.2008 kl. 18:07]

Frábær áfangasigur !

[Anna Ólafsdóttir (anno) (IP-tala skráð) 19.5.2008 kl. 18:12]

Þetta er svo mikill gleðidagur að ég brýt bloggbannið sem ég setti á sjálfa mig án þess að hugsa mig um tvisvar til að óska okkur öllum til hamingju með daginn. Og hvar er meira tilefni til að gera það heldur en á bloggsíðunni þinni Lára Hanna.  Eftir að hafa fylgst með baráttunni þinni í þessu máli alveg síðan í haust hef ég aftur öðlast trú á að það geti skilað árangri að fólkið í landinu haldi þeim sem taka ákvarðanir við efnið og láti vita að fylgst sé með verkum þeirra. Takk fyrir þitt ómetanlega framlag í þeim efnum.

[Árni Gunnarsson, 19.5.2008 kl. 18:12]

Til hamingju við öll!

Þér verður seint fullþakkað Lára Hanna.

Vonandi er þetta vísbending um straumhvörf í ákvörðunum um nýtingu náttúruauðlinda.

[Petra Mazetti (IP-tala skráð) 19.5.2008 kl. 18:13]

Æðislegt!!! Einnig er ég fegin að hafa ekki hlustað á þá sem segja "það þýðir ekkert að gera athugasemd".

Ég skora á OR að hætta við Bitruvirkjun og vona svo að framhaldið í þessari sögu verði að svæðið verði friðlýst til frambúðar.

[Ása Björk (IP-tala skráð) 19.5.2008 kl. 18:24]

Hamingjuóskir til okkar allra sem unnum útivist og þessu landi! Sérlega átt þú þó hrós skilið fyrir þín vönduðu vinnubrögð og dug Lára Hanna.  Kveðja Ása Björk

[Ingólfur Ásgeir Jóhannesson, 19.5.2008 kl. 18:26]

Hamingjuóskir til þín og allra annarra sem hafa tekið þátt í baráttunni gegn Bitruvirkjun

[Ragnheiður Ólafía Davíðsdóttir, 19.5.2008 kl. 18:27]

Til hamingju með þennan áfangasigur. Mikið er ég stolt af þér, Lára mín. Ég er ekki í vafa um að barátta þín skipti máli - miklu máli. Þetta er stór dagur.

Ég skora á Orkuveitu Reykjavíkur að hætta við að reisa Bitruvirkjun og Sveitarfélagið Ölfus að hætta við að breyta svæðinu í iðnaðarsvæði!

[Einar Indriðason, 19.5.2008 kl. 18:34]

Já, til lukku með þennan áfanga.

[Heidi Strand, 19.5.2008 kl. 18:34]

Til hamingju Ísland!

[Bumba, 19.5.2008 kl. 18:34]

Frábært, stórkostlegt, þú ert kjarnakona, skilgetin dóttir hinnar Íslenzku moldar elsku Lára Hanna. Þakka þér fyrir þína góðu baráttu og fyrir þá sem þú hefur fengið í lið með þér. Hjartanlega til Hamingju enn og aftur. Með beztu kveðju.   

[Helga (IP-tala skráð) 19.5.2008 kl. 18:38]

Þakka þér Lára Hanna umfram alla aðra. Endurtek fyrri orð mín um að þú ert búin að skipa þér á bekk með Sigríði frá Brattholti  og þá geri ég ekki lítið úr Guðmundi Ólafssyni náttúrufræðingi og Ómari Ragnarssyni.

[Ásgeir Kristinn Lárusson, 19.5.2008 kl. 18:44]

Til hamingju, Íslendingar! Þetta er dýrmætur áfangasigur í þeirri baráttu, sem æ fleiri styðja; verndun íslenskrar náttúru.

[Ólafur Örn Pálmarsson (IP-tala skráð) 19.5.2008 kl. 19:59]

Áfangasigur og vonandi byrjun á því að meta náttúruna og gildi hennar umfram fjármagn auðhringa sem hugsa um skammtímagróða en ekki mann og náttúru til langframa.

[Björn Pálsson (IP-tala skráð) 19.5.2008 kl. 20:06]

Þakklæti til Skipulagsstofnunar og Láru Hönnu og Petru fyrir ötula og málefnalega baráttu á netinu. Mér er efst í huga hin mikla breyting sem orðið hefur á viðhorfi, einkum yngra fólk, frá því barist var gegn virkjun í Grænsdal í upphafi aldar. Von mín er að niðurstaða Skipulagsstofnunar varði leiðina til þess að svæðið verði friðlýst og umgengni vönduð. Þannig mun hin fjölbreytta náttura þar verða kynslóðum nútíðar og framtíðar til lífsfyllingar.

[Kristbjörg Þórhallsdóttir (IP-tala skráð) 19.5.2008 kl. 20:24]

Elsku besta Lára Hanna. Til hanmingju!  Það er hreint æðislegt að opinber stofnun sé til í að láta náttúruna einu sinni njóta vafans. Þakka þér þrautsegjuna og málefnalegan flutning á þínum og okkar sjónarmiðum. Kærar kveðjur til Petru og hjartans þakkir til ykkar beggja og allra sem tjáðu sig um málið.

Kveðjur frá Kristbjörgu Þórhallsdóttur

[Himmalingur, 19.5.2008 kl. 20:25]

Ég er að rifna úr stolti! þrefalt húrra fyrir þér Lára Hanna!!!!!!!

[Gunnar Hrafn Jónsson (IP-tala skráð) 19.5.2008 kl. 20:52]

Innilega til hamingju, Lára Hanna! :)

[Gunnar Hrafn Jónsson (IP-tala skráð) 19.5.2008 kl. 20:52]

Já, og aðrir Íslendingar

[Steingrímur Helgason, 19.5.2008 kl. 20:53]

Áfangasigur glæsilegur hjá þér & ég grjatjúlera.

[Örvar Már Kristinsson (IP-tala skráð) 19.5.2008 kl. 21:14]

Já svo sannarlega sætur áfangasigur ... 

Kv. Örvar

[Sigurður Hrellir, 19.5.2008 kl. 21:16]

Við náttúruverndarsinnar getum í dag ekki annað en brosað breitt. Þið sem stóðuð að gerð síðunnar hengill.nu eigið mikið hrós skilið því að án ykkar góða starfs hefðu athugasemdir eflaust orðið mun færri og smærri. Baráttan er hins vegar rétt nýhafin og ekki tímabært að fagna fullum sigri ennþá.

Það verður forvitnilegt að frétta hvað yfirstjórn Orkuveitunnar ákveður að fengnu þessu afdráttarlausa áliti Skipulagsstofnunar. Væntanlegu álveri í Helguvík vantar fyrirsjáanlega orku í stórum stíl. Sveitarstjórninni í Ölfusi dreymir enn um að skilgreina svæðið við Bitru/Ölkelduháls sem iðnaðarsvæði. Sjáum til hvað þeim dettur næst í hug.

Ég tek heilshugar undir áskorun þína til OR og Sveitarfélagsins Ölfuss og skora hér með á þá að hætta við að reisa Bitruvirkjun og að breyta svæðinu í iðnaðarsvæði!

[Hafsteinn Viðar Ásgeirsson, 19.5.2008 kl. 21:24]

Góður áfangasigur, en nú er að sjá hvernig brugðist verður við í Ölfusi. Setur ekki Áki undir sig hausinn og reynir að láta sem hans sé valið?

[Sturla Snorrason, 19.5.2008 kl. 21:30]

Til hamingju Lára Hanna og allir náttúruverndarsinnar.

[Auður Matthíasdóttir (IP-tala skráð) 19.5.2008 kl. 21:40]

Kæra Lára Hanna.  Til hamingju með þennan áfanga og hamingjuóskir  og þakkir til  þín og allra þeirra, sem hafa látið sig mál þetta varða.    Það er svo gott að upplifa sætan sigur eftir sorgina sem fylgdi Kárahnjúkaódæðinu.  Nú hlýtur að fara að rofa til hjá ráðamönnum og náttúran verði framvegis metin sem verðmæti.  Munum eftir Langasjó.  Þar er verka að vinna/vernda.  Og svo margir aðrir staðir , sem græðgin hefur augastað á.  Urriðafoss   og Vestfirðir, Trölladyngja og margir fleiri dásamlegir staðir í náttúru landsins.  Hvað er t.d. í gangi með Hrafnabjargafossa?  Eru þeir í hættu? ÆÆ best að snúa sér að því að vera bara kát með þennan áfanga!!!  Vel að verki staðið,  mín kæra! 

[alva (IP-tala skráð) 19.5.2008 kl. 22:03]

 Frábært!!!!  

[Kristjana Bjarnadóttir, 19.5.2008 kl. 22:12]

Þú ert óþreytandi við að halda okkur við efnið, minna okkur á mikilvægi ósnortinnar náttúru og skyldur til að skila henni til komandi kynslóða. Draga djúpt andann og meta hvert við stefnum og hvert við viljum fara, gera okkur grein fyrir að verðmæti felast í fleiru en því sem í kassann kemur.

Hafðu fyrir það þakkir frá mér, til hamingju með þennan áfanga.

[Anna Kr. Pétursdóttir (IP-tala skráð) 19.5.2008 kl. 22:12]

Dugleg Lára og til hamingju!  - Það vantar svona "þrammara" sem plægja leiðina fyrir okkur hin - og það hefur þú svo sannarlega gert Lára - ég fylgi með ánægju, því þetta mál er sko ekki  búið.

kv. 

Anna Kr. Pétursdóttir

[Maria Elvira Méndez Pinedo, 19.5.2008 kl. 22:17]

Til hamingju, Lára Hanna! Áfram, bárattan þín hefur verið nauðsynlegt. Þúsund takk!

Muchísimas felicidades! En mi tesis doctoral sobre el acceso a la justicia ya en 1997 tuve la oportunidad de estudiar la eficacia del Derecho en relación al medioambiente. Desgraciadamente la situación no ha mejorado mucho desde entonces. A pesar del ordenamiento jurídico europeo, la lucha del siglo XXI consistirá en asegurar la tutela y protección eficaz de nuestra naturaleza y medioambiente con nuevas medidas, iniciativas y acciones propuestas por la sociedad civil. En realidad los ordenamientos procesales, incluidas las normas europeas, están basadas en una concepción anticuada de los intereses a proteger fruto de las ideas del s. XIX y de una concepción individualista de los problemas. Quien posee al agua que nos da la vida? Quien es el duenyo del aire que respiramos? 

Los intereses comunes, los intereses colectivos como la naturaleza y medioambiente merecen un nuevo Derecho, unos nuevos recursos procesales adecuados a su medida pero, sobre todo, una nueva clase política que represente a las nuevas generaciones y un nuevo  poder legislativo y ejecutivo que se atreva de verdad a dar el gran paso de preservar unos recursos que no nos pertenecen, sólo nos han sido prestados...

[Maria Elvira Méndez Pinedo, 19.5.2008 kl. 22:32]

Sorry it was all in Spanish. Here is an English version.

Who owns the air that we breathe? the water that gives us life? Who owns the nature that keeps us alive? The environment and nature that we have inherited?

The protection of the environment is a collective/common good or interest that deserves a new legal order and new procedural mechanisms based on our ideas of the 21st century. We need a new political class that represents our new generation. We need a new legislative and executive powers that declare at last the priority number 1 of protecting the nature of a world that does not belong to us. The role of individuals such as you representing a new civil society is essential in this battle. Another world is possible, we need to fight together to make it happen.

The Environmental Impact Assessment procedures in force within the EC/EEA law do not have as a main goal the protection of the environment, they only ask for procedural rules and evaluation exercices.  If properly evaluated, an environment such as Hellisheiði would be turned into an industrial area. We need to do better.... In this context, it is very interesting to follow the new proposal of the European Commission on the use of criminal law for those who destroy a natural habitat....

[Ólafía Jakobsdóttir (IP-tala skráð) 19.5.2008 kl. 22:34]

Innilegar hamingjuóskir með þennan áfanga. Ég hef lesið bloggið þitt og dáist að dugnaði þínum og baráttuanda .

[Víðir Benediktsson, 19.5.2008 kl. 23:36]

Til hamingju 7-9-13

[Heiða Þórðar, 19.5.2008 kl. 23:40]

Innilega til hamingju! Frábært!

[Guðmundur Brynjólfsson (IP-tala skráð) 20.5.2008 kl. 01:49]

Fögnum ekki of snemma. Það er fullt af þvergirðingshætti á ferli.

http://blogg.visir.is/gb/2008/05/19/hjorleifur-kvaran-synir-rokfimi-sina/

M.ö.o. rökleysið er algjört.

[Hólmdís Hjartardóttir, 20.5.2008 kl. 02:06]

Frábært.....en ég vil ekki virkja Þeystareyki þann frábæra stað.....erfitt fyrir mig að skrifa mikið um það með bróður minn í forsvari fyrir þeirri virkjun Þú ert hetja okkar sem vilja verja náttúrua.

[Sigurður Þorsteinsson, 20.5.2008 kl. 04:58]

Til hamingju! Segir okkur að baráttan skilar okkur árangri.

[Þórunn (IP-tala skráð) 20.5.2008 kl. 11:52]

Elsku Lára Hanna og Petra til hamingju, takk fyrir ötula, óeigingjarna og ekki síst mikulvæga baráttu í þágu okkar allra.

Ég skora á Orkuveitu Reykjavíkur og Sveitarfélagið Ölfus að hætta við að reisa Bitruvirkjun og að hætta við að breyta svæðinu í iðnaðarsvæði!

[Úrsúla Jünemann, 20.5.2008 kl. 12:32]

Aftur og aftur til hamingju, þetta var besta frétt í langan tíma. Verum áfram vakandi fyrir slíkum málum.

[Hrafnhildur (IP-tala skráð) 20.5.2008 kl. 13:13]

Til hamingju :o)

http://www.mbl.is/mm/frettir/innlent/2008/05/20/haett_vid_bitruvirkjun/

[Andrea (IP-tala skráð) 20.5.2008 kl. 15:24]

Þetta eru frábærar fréttir og takk fyrir að hafa staðið vaktina.

Vonandi að þetta hafi fordæmisgildi fyrir virkjanir í framtíðinni. Að það verði ekki auðsótt mál að vaða inná osnortin svæði og öllu rústað.

Versta er að svo mikil orka á Íslandi er seld fyrir lítið sem ekkert og er ekki virðisaukandi, Landsvirkjun hagar sér eins og fíll í postulínsbúð en Orkuveitan ætlar að stíga varlega til jarðar.

Óttast samt að Hjörleifur og samstarfsmenn hafi ekki alveg gefist upp.

Við skulum ekki gleyma því að Eyjabökkum var þyrmt en i staðinn var Káranhjúkavirkjun að veruleika. Er hrædd um að nú þurfi Orkuveitan að fá eitthvað annað.

[Páll Ásgeir Ásgeirsson (IP-tala skráð) 20.5.2008 kl. 15:45]

Auðvitað er freistandi að kalla þig Sigríði í Brattholti en barátta þín hefur verið til fyrirmyndar. Hér sannast enn einu sinni að það eru ekki nefndir eða ráð sem hafa áhrif heldur einstaklingar og þeirra persónulegi eldmóður og sannfæring.

TIl hamingju með afgerandi niðurstöðu Skipulagsstofnunar og viðbrögð Orkuveitu Reykjavíkur. Þú átt miklar þakkir skildar fyrir þitt framlag í þessu máli.

[Ólafur Ragnarsson, Hvarfi, 270 Mosfellsbæ (IP-tala skráð) 20.5.2008 kl. 16:06]

  Innilega til hamingju   !!!

[Jón Magnús, 20.5.2008 kl. 16:47]

Til hamingju með árangurinn.  Það væri umhverfisslys að byggja þessa virkjun á þessum yndislega stað.

[Guðríður Haraldsdóttir, 20.5.2008 kl. 18:43]

Til hamingju, snillingurinn minn!

[Kristin Jonsdottir (IP-tala skráð) 20.5.2008 kl. 19:07]

Til hamingju og kærar þakkir. Ég tek undir áskorunina:

"Ég skora á Orkuveitu Reykjavíkur að hætta við að reisa Bitruvirkjun og Sveitarfélagið Ölfus að hætta við að breyta svæðinu í iðnaðarsvæði!" Kristín Jónsdóttir, Frakklandi.

[Sigga Magg (IP-tala skráð) 20.5.2008 kl. 19:51]

Frábær árangur hjá þér, Lára Hanna! Til hamingju þú og til hamingju Íslendingar.

[Hundshausinn, 20.5.2008 kl. 20:21]

Í sjálfu sér er Ölkelduhálsinn einungis táknræn birtingarmynd þess áþreifanlega, ein af mörgum. Úrskurð Skipulagsstofunar má þó í raun heimfæra upp um öll lítt eða óröskuð svæði Reykjanesskagans. Sérhvert þeirra býr bæði yfir landslagsheildum sem og/eða friðuðum nútímahraunum. Og á hvaða svæði skagans myndi slík virkjun ekki hafa "verulega neikvæð og óafturkræf áhrif á landslag, útivist og ferðaþjónustu, þar sem um er að ræða lítt snortið, fjölsótt útivistarsvæði í nágrenni þéttbýlis/höfuðborgarsvæðisins"?
Hversu mörg þeirra, er hafa tjáð sig, eru í raun meðvituð um öll hin svæðin, sem eru og munu verða í hættu vegna fyrirhugaðra jarðvarmavirkjana til að ná fram áætlaðri orkuþörf???

[Hafsteinn Hafsteinsson (IP-tala skráð) 20.5.2008 kl. 22:38]

Guði sé lof. Segi enn og aftur, að virkja ár og jarðvarma er ekki bara óþarft heldur úrelt. Hafði vonað að a.m.k. umhverfissinnar s.s. Vinstri Grænir legðu við eyru en svo er ekki enn. Með þessum aukna þrýstingi eftir orku er bara stutt í næstu orustu.

[Emil Hannes Valgeirsson, 20.5.2008 kl. 23:09]

Frábær árangur góðrar baráttu. Það er farið að þrengja verulega að álverssinnum, vonandi fara menn nú að hugsa sinn gang áður en þeir skipuleggja orkuver og stóriðjur og í hverju plássi.

[Eva Benjamínsdóttir (IP-tala skráð) 21.5.2008 kl. 09:44]

Sæl Lára Hanna, þetta er ljúft. Dásamlegur árangur og dugnaður í þér. Til hamingju

[Katrín Hafsteinsdóttir (IP-tala skráð) 21.5.2008 kl. 10:27]

Tek undir áskorunina: "Ég skora á Orkuveitu Reykjavíkur að hætta við að reisa Bitruvirkjun og Sveitarfélagið Ölfus að hætta við að breyta svæðinu í iðnaðarsvæði!"

...og til hamingju með þennan áfangasigur.

kveðja

Katrín

[Lára Hanna Einarsdóttir, 22.5.2008 kl. 00:50]

Það er ekki fræðilegur möguleiki að svara öllum þessum athugasemdum - enda kannski ekki þörf á því.

En ég vil þakka kærlega öllum sem hafa sýnt þessu málefni ómetanlegan stuðning, hvort sem er í orði eða á borði, og minna fólk í leiðinni á að þessu máli er langt í frá lokið. Þetta er ekki í höfn fyrr en búið er að friðlýsa allt svæðið í kringum Bitru og Ölkelduháls.

[Stefán Helgi Valsson, 24.5.2008 kl. 03:07]

Það er gaman að sjá að öll vinnan sem þú lagðir í þetta verkefni skilaði sér á endanum.