Fyrir hvað borgum við ráðherrunum laun?

Hvað borga ég Árna Mathiesen í laun á mánuði? Milljón? Tvær? Ég veit það ekki og fann ekki upplýsingar um það. Þó er ég vinnuveitandi hans og hlýt þar af leiðandi að gera kröfur til árangurs í starfi, viðveru og að hann sinni aðkallandi verkefnum. Árni er dýralæknir að mennt en starfar sem fjármálaráðherra íslensku þjóðarinnar - hvernig svo sem fólk fær það til að ganga upp.

Fjárhagur þjóðarinnar ku vera á heljarþröm - það segja allir nema ráðherrar. Lítið sem ekkert hefur heyrst frá Árna... og reyndar ekki heldur frá hinum ráðherrunum sem eru á launaskrá hjá þjóðinni. Árni fjármálaráðherra hefur engar lausnir, engar tillögur - það kemur ekkert af viti frá honum. Hann hlýtur að vera búinn að týna buddunni.

Eitt heitasta deilumálið þessa dagana og vikurnar er kjarabarátta ljósmæðra. Sem fjármálaráðherra og aðalviðsemjandi ljósmæðra fyrir hönd þjóðarinnar myndi maður ætla að Árni ætti að vera vakinn og sofinn yfir viðræðunum og leggja sitt af mörkum. Hann fær jú meðal annars borgað fyrir það - úr okkar vasa. En hann nennti ekki að sinna starfinu og stakk af í réttir í nýja kjördæminu, væntanlega til að snapa atkvæði. Er það ekki brottrekstrarsök? Það væri það í öllum venjulegum fyrirtækjum, er ég hrædd um.

Ég hef ekki í annan tíma skynjað eins mikinn stuðning meðal þjóðarinnar við kjarabaráttu neinnar stéttar eins og ljósmæðra nú. Síðast þegar ég skynjaði viðlíka samstöðu um eitthvað mál var þegar hið alræmda fjölmiðlafrumvarp var í bígerð.

Hér er enn eitt myndbandið til stuðnings ljósmæðrum, hið fjórða í röðinni. Málstaðurinn er þess virði. YouTube linkur hér fyrir þá sem vilja styðja málstaðinn.