Bækur á óskalistann

Ég lærði að lesa í laumi þegar ég var fimm ára. Eldri systir mín var í sex ára bekk í Landakotsskóla og ég fékk að fylgjast með þegar hún æfði sig gegn því að ég væri þæg og þegði. Þess vegna vissi enginn fyrr en ég var allt í einu orðin læs. Síðan hef ég verið með nefið ofan í bókum - og það er óralangt síðan ég var fimm ára.

Þessa bók nefndi ég nýverið, þá nýbyrjuð að lesa hana. Hún veldur mér engum vonbrigðum og stendur fyllilega undir væntingum. Hér er umsögn um hana á Smugunni. Ég held að flestir dómar um bókina hafi verið í þessa veru.

Ég vinn hjá sjálfri mér og auðvitað gaf vinnuveitandinn starfsmanninum afmælisgjöf um daginn. Það var Ofsinn hans Einars Kárasonar sem ég hlakka mikið til að lesa. Ég fékk fyrstu Sturlungabók Einars, Óvinafagnað, þegar hún kom út fyrir mörgum árum og það var geggjuð bók. Hér er Víðsjárviðtal við Einar frá 2. des. sl. (aftast í þættinum) þar sem Einar segir m.a. frá tilurð þriggja orða kaflans í Óvinafagnaði. Hann hélt að enginn hefði tekið eftir þessari snilld, en það er aldeilis ekki rétt! Ég spái því að þetta verði trílógía hjá Einari.

Þar kom að því að maður fengi áhuga á Sturlungu. Sami vinnuveitandi gaf sama starfsmanni síðan bráðskemmtilegt þriggja kvölda námskeið hjá Endurmenntun þar sem Einar fór á stökki yfir Sturlungu og leiðbeindi um hvernig þægilegast væri að lesa hana. Vonandi hef ég tíma til þess þegar og ef um hægist. Ofsi hefur fengið einróma lof og síðast í gær valdi starfsfólk bókaverslana bókina bestu skáldsögu ársins. Gerður Kristný var svo með bestu barnabókina. Kastljós sýndi frá afhendingu viðurkenninganna.

Í einni af gramsferðum mínum í bókabúðir fann ég litla bók sem vakti athygli mína. Hún var svo skemmtileg og svo ódýr að ég keypti fjórar. Gaf þrjár í afmælisgjafir en hélt eftir eintaki fyrir sjálfa mig. Þetta er bókin Jólasveinar - af fjöllum í fellihýsi eftir Magneu J. Matthíasdóttur með myndskreytingum eftir Ólaf Pétursson. Í bókinni er fjallað um nútímavæðingu jólasveinanna í bundnu máli, listilega gert. Það er ekki oft sem bækur henta öllum aldurshópum en það gerir hún þessi. Dæmi um minn gamla uppáhaldsjólasvein, Kertasníki, með leyfi höfundar:

Kertasníkir um kerti bað
er kom hann mannabyggðum að,
í hellinum vild'ann hafa bjart
og hrekja burt vetrarmyrkrið svart.

(Nú þjóðar velferð hann þættist styrkja
og þyti upp á heiðar að virkja.)

En ein er sú bók sem ég ágirnist einna mest og höfðar ótrúlega sterkt til sagnfræðinördsins í mér. Ég skil ekkert í mér að hafa ekki lært sagnfræði. Það er bók með því stóra nafni Saga mannsins - frá örófi fram á þennan dag, hvorki meira né minna. Ég er búin að fletta henni í bókabúð og sökk ofan í hana á staðnum. Bókin er byggð á erlendu verki sem komið hefur út í ýmsum löndum, en ritstjóri íslensku útgáfunnar er Illugi Jökulsson. Vanur maður á þessu sviði sem öðrum. Illugi ritstýrir líka hinu bráðskemmtilega tímariti Sagan öll sem ég hef verið áskrifandi að frá fyrsta tölublaði. Hér er smá sýnishorn af opnu úr bókinni.

Illugi var í Mannamáli á sunnudaginn að ræða um bókina, en því miður náðu Kiljuspekúlantar ekki að fjalla um hana nema í mýflugumynd í síðustu Kilju fyrir jól í gærkvöldi. Þau verða eiginlega að taka hana eftir áramót, því svona bækur eru sígildar og eilífar. Miklu meira en bara jólabækur.

Ef jólasveinar eru til í alvörunni, eins og grunur leikur á, hlýt ég að fá þessa í skóinn.

Athugasemdir

[sigurvin (IP-tala skráð) 18.12.2008 kl. 20:44]

Það er gaman að sjá hvað sagnfræðilegar skáldsögur eru að verða vinsælar á síðustu árum. Athyglisvert í ljósi þess að helstu snilldarverk H.K. Laxness eru einmitt af þessari gerð sbr. Íslandsklukkan sem maður þarf helst að lesa annaðhvert ár.

Lengi vel var það nánast bara snillingurinn Björn Th. Björnson sem skrifaði svona bækur og sagnfræðina var varla að finna nema hjá fornbókasölum. En nú virðast rithöfundar halla sér meira í þessa átt. Fyrir utan Einar hefur Ragnar Arnalds komið með mjög góðar sagnfræðilegar bækur.

Ég hef nú ekki lesið Ofsann en mín uppáhaldsbók eftir Einar K er held ég hans fyrsta bók á þessu sviði Norðurljós.

Þetta eru bara svona vísbendingar frá áhugamanni til þeirra sem hafa áhuga á Íslandssögunni, og þá má ég ekki sleppa bókum Jóns Helgasonar t.d. Vér Íslands börn sem hefur m.a. að geyma frábærar sagnir af frægum glæpamálum. Það má vel fá góðar jólagjafir hjá fornbókasölum - í kreppunni.

[sigurvin (IP-tala skráð) 18.12.2008 kl. 20:52]

PS

Á frænku. Þegar hún var 5 ára uppgötvaðist skyndilega að hún var orðin læs. En hún snéri bókinni á hvolfi. Hún fylgdist líka með eldri systur sinni - sat hinu megin við borðið.

[Heidi Strand, 18.12.2008 kl. 22:55]

Verður mótmæli á laugardag?

Ég er með hugmynd.

[Víðir Benediktsson, 18.12.2008 kl. 23:02]

það verður nóg að gera í jólafríinu við bókalestur.

[Jóna Kolbrún Garðarsdóttir, 19.12.2008 kl. 02:25]

Ég ætla að prófa þetta Windows Vista í nokkrar vikur og sjá svo til ég á Windows XP home á diski ef mér líkar ekki við þetta forrit.  Tölvan mín er ofboðslega flott með innbyggðri vefmyndavél og allskonar skemmtilegheitum.    Ég hef notað Windows XP í mörg ár og líkar mér vel við það forrit, og kann ég náttúrulega best á það.