Ábyrgðarleysi og sóðaskapur

Leiðsögumenn erlendra ferðamanna eru þeir sem kynnast ferðamönnunum best á meðan þeir staldra við, áhuga þeirra á landinu, ánægju með það - og kvörtunum yfir því. Leiðsögumenn þurfa að leysa hvers manns vanda, fræða, skýra, svara, hugga, græða og almennt redda því sem redda þarf hverju sinni. Þeir gegna jöfnum höndum hlutverki sálfræðinga, fræðara og reddara. Leiðsögumenn eru á ferðinni um allt land og koma á flesta þá staði sem heimsóttir eru í skipulögðum - og óskipulögðum ferðum ferðaskrifstofa og annarra.

Yfirvöld ferðamála ættu því að leggja eyrun við þegar leiðsögumenn tala og taka fullt mark á þeim. Þeir vita nákvæmlega hvernig ástandið er á öllu mögulegu um allt land.

Í sumar hafa heyrst fjölmargar kvartanir frá leiðsögumönnum um ástand salerna víðs vegar um landið. Þau eru lokuð, biluð eða jafnvel ekki fyrir hendi á fjölförnum stöðum þar sem margir rútufarmar af ferðamönnum staldra við á hverjum degi til að njóta náttúrufegurðar Íslands - og þá eru ótaldir allir sem ferðast um á einkabílum eða bílaleigubílum. Við Íslendingar erum auðvitað sjálfir þar á meðal. Hversu viljugir og fjölhæfir sem leiðsögumennirnir eru geta þeir ekki leyst þetta tiltekna vandamál.

En þeir geta látið vita af vandanum og hafa gert það af miklum krafti það sem af er sumri, m.a. í viðtölum við fjölmiðla. Nokkrir leiðsögumenn hafa einnig skrifað um málið á bloggsíður sínar og nægir þar að nefna Úrsúlu, Guðjón og Berglindi. Fjallað var um málið í hádegisfréttum RÚV núna áðan og í Fréttablaðinu í morgun var viðtal við Börk Hrólfsson, leiðsögumann, sem ég set inn hér að neðan. Börkur er þekktur fyrir að tala tæpitungulaust og það gerir hann hér sem endranær.

Takið eftir svörum ferðamálastjóra: "....þótt Ferðamálastofa sjái um uppbyggingu salerna sé það ekki hennar hlutverk að sjá um rekstur þeirra." Hvers hlutverk er það þá? Við hvern á að tala? Hver ber ábyrgð á því að náttúruperlur okkar séu ekki útmignar og -skitnar og mishuggulegur pappír fjúkandi um allar grundir? Spyr sú sem ekki veit og ég vildi gjarnan sjá fjölmiðla grafa það upp og halda áfram að spyrja.

Í tónspilaranum ofarlega til vinstri eru samanklipptar tvær fréttir um málið, önnur frá 3. júlí sl. og hin frá í hádeginu í dag - merkt: Fréttir - RÚV - 3. og 14.7.08 - Salernismál í ólestri - Kári Jónasson, leiðsögumaður og Ólöf Ýrr Atladóttir, ferðamálastjóri.

Athugasemdir

[Valgeir Bjarnason, 14.7.2008 kl. 13:36]

Orð í tíma töluð Lára.

Það er ótrúlegt að á meðan íslenska ríkið er tilbúið að eyða milljörðum í rannsóknir á "orkukostum" (les eyðileggingu) landsins skuli ekki vera lagt fé í sjálfsagða hluti eins og salernisaðstöðu.

Annars hafa ferðamálin verið á flakki í stjórnarráðinu. Líklega vita fáir hvar þau eiga heima nú og hvaða ráðherra ber ábyrgð á þessu aðstöðuleysi. Einhvern tíma voru þau í samgönguráðuneytinu, en getur einhver upplýst hvar þau eru stödd nú?

Með kveðju,

[Lára Hanna Einarsdóttir, 14.7.2008 kl. 13:41]

Um síðustu áramót voru ferðamálin voru flutt úr skúffu í Samgönguráðuneytinu yfir í skúffu í Iðnaðarráðuneytinu. Þessi málaflokkur hefur aldrei hlotið þá athygli sem hann verðskuldar og virðist ennþá vera olnbogabarn innan stjórnkerfisins.

Svo virðist sem það eigi bara að græða á ferðaþjónustunni en ekki leggja neitt af mörkum til hennar.

[Ásgeir Kristinn Lárusson, 14.7.2008 kl. 13:59]

Legg til, að stofnað verði Ferðamálaráðuneyti. Fyrst þessi þjóð getur varið á þessu ári 1.350 millj. í svokallaða Varnarmálastofnun, þá sé ég ekkert því til fyrirstöðu, að stofna verði sérstakt ráðuneyti um ferðamál. Ekki veitir af !

[Óskar Þorkelsson, 14.7.2008 kl. 14:46]

tek undir með Ásgeiri

[Berglind Steinsdóttir, 14.7.2008 kl. 15:01]

Nú HLÝTUR Ólöf Ýrr að bretta upp ermarnar. Það er ekki hægt að senda henni skýrari skilaboð. Ég TRÚI að hún vilji gera það rétta, ég trúi því, trúi því. Frá áramótum hefur hún bara verið upptekin við að setja sig inn í önnur mál. En þarfapíramídinn er svona, ef fólki er ekki sæmilega hlýtt, fær ekki að borða og skila matnum aftur frá sér á sæmilega öruggum stað getur það síður notið annarra gæða lífsins.

Ferðamálastjóri, koma svo!

[Valgeir Bjarnason, 14.7.2008 kl. 15:21]

Ferðamálin eru of mikilvægur málaflokkur til að liggja ofaní einhverri skúffu í einhverju ráðuneyti. Tek því undir með Ásgeiri og Óskari um að stofna sérstakt ferðamálaráðuneyti og setja þau þar með á þann stall sem þau verðskulda.

Ég vil einnig taka undir hvatningu Berglindar til Ólafar Ýrr, hér þarf svo sannarlega að bretta upp ermarnar! 

[Anna Ólafsdóttir (anno) (IP-tala skráð) 14.7.2008 kl. 16:52]

Þrátt fyrir að ferðaþjónusta sé búin að vera stór atvinnugrein hér á landi í fleiri fleiri ár og alltaf að vaxa virðist hún aldrei hafa hlotið þá virðingu og "aðhlynningu" frá yfirvöldum sem henni ber. Það segir kannski eitthvað um forgangsröðunina. Kannski væri eina ráðið að stofnað yrði ferðamálaráðuneyti. Mér líst allavega vel á það skref.

[Lilja Guðrún Þorvaldsdóttir, 14.7.2008 kl. 17:16]

Það væri kannski ráð að biðja Iðnaðarráðherra um að opna nýju skúffuna frá Samgönguráðuneytinu.  -  Það mætti kannski bjóða honum að einhverjir sem eru málum vel kunnugir, - hjálpuðu honum að taka uppúr skúffunni og sortera með honum pappíranna og jafnvel raða þeim fyrir hann upp á nýtt. -  Alveg er ég handviss um að hann Össur tæki vel í það.  Því svona getur þetta ekki gengið.

[Óðinn Þórisson, 14.7.2008 kl. 22:04]

Ég held að það þurfi nýja hugsun inn í ferðamannaiðnaðinn. Kanski er ein leið að rukka þá sem gera út á að fara með ferðamenn að skoða okkar náttúruperlur eins og þeir sem eiga Kerið ætla að gera.

[Lára Hanna Einarsdóttir, 14.7.2008 kl. 22:57]

Ég fékk tölvupóst frá eðalleiðsögumanninum Erling Aspelund í dag þar sem hann sagði (birt með leyfi Erlings):

"Ég skrifaði Ferðamálastofu fyrir allnokkru um gangstíginn niður að Gullfossi. Ekkert hefur verið gert til bóta þar sl. 5 ár, eða síðan ég byrjaði á þessum ferðalögum. Ég spurði í sakleysi mínu hvort starfsmenn Ferðamálastofu kæmu aldrei á vinsæla ferðamannastaði og skoraði á þau að gera eitthvað í málinu.

Grasbrekkan ofan við stíginn er orðin eitt moldarflag vegna hins stóra polls sem ávallt er til staðar. Væri stígurinn hækkaður upp og lagfærður svo vatn rynni af honum en safnaðist ekki fyrir yrði þetta í lagi. Verkið tæki nokkrar klukkustundir. Enginn hefur svarað fyrirspurn minni.

Salernin við Djúpalón hafa verið biluð í tvö ár! Vantar varahluti, segja starfsmenn þjóðgarðsins.
(Í tvö ár! Það tekur tvo daga að fá varahlut í bíl!)"

Mig grunar að fleiri leiðsögumenn og aðrir sem vinna við ferðaþjónustu hafi ekki haft erindi sem erfiði með ábendingar sínar til ferðamálayfirvalda. Hvað veldur?

[Steingrímur Helgason, 14.7.2008 kl. 23:58]

Á ekki Ferðamálaráð að sjá um & tryggja að þau salerni sem upp eru sett á hennar vegum séu mannsæmandi & í brúkandi ásigkomulagi ?  Er ekki þeirra að stýra því hjá viðkomandi rekstaraðilum & landvörðum á hverjum stað fyrir sig?  Er þetta mázke með öllu óþarft óábyrgt stjórnsýslubatterí & væri fé því sem í það fer betur varið með að stofna embætti 'farandíslandsferðamannakamarzhreinsitæknis' ?

Ólöf Ýrr ætti náttúrulega forgáng í það djobb, á núverandi launum,  frekar en að gera við hana rándýrann starfslokasamníng.

[Hólmdís Hjartardóttir, 15.7.2008 kl. 00:17]

Góð landkynning þetta

[Anna Karlsdóttir, 15.7.2008 kl. 00:47]

Það er ekki gott afspurnar ef að ferðamálayfirvöld láta sig ekki niðurníðslu og klósettleysi ferðamannasvæða varða. Ég er þó ekki viss um að það sé verið að spyrja réttu  aðilana í þessu máli. Ég veit ekki betur en að í þjóðgörðunum séu þjóðgarðsverðir eða landverðir sem að eiga að vera með svona á hreinu og leita lausna. Ég veit heldur ekki betur en að ferðamálastofa hafi á  sínum snærum umsjónarmann umhverfismála sem situr á Akureyri og heitir Valur Þór Hilmarsson. Oftlega og í mörgu samhengi hefur verið bent á niðurníðslu ákveðinna svæða og þörfina fyrir úrbætur, það er víst ekkert nýtt. Ferðamálastofa hefur lagt áherslu á að dreifa þurfi ferðamönnum meira um svæði landsins, því víst er að marga fleiri áhugaverða staði er hægt að berja augum og njóta en helstu leiðaáætlanir skipulagðra ferða troða. ...En það er bara ekki nógu gott sama hver á að svara fyrir ef engin(n) getur almennilega svarað. Hvað hefur orðið um úrræða hæfnina (problem solving skills) - hvert gufaði hún upp?

[alva (IP-tala skráð) 15.7.2008 kl. 00:49]

Tek undir það, það vantar sérstakt ráðuneyti fyrir ferðamál!!!! Þetta er hryggðarástand.

[Úrsúla Jünemann, 15.7.2008 kl. 00:50]

Mér sýnist að hingað til hefur verið áriðandi stefna í ferðamálum að koma sem mest ofan í túristana. En það sem gengur neðan af þeim er ekki sérlega spennandi enda ekki mikið af því að græða.

[Jenný Anna Baldursdóttir, 15.7.2008 kl. 08:11]

Það á auðvitað að stofna ferðamálaráðuneyti.  Við lítum til ferðamannaiðnaðarins sem ört stækkandi tekjumöguleika.  Hvað er að?

Lára Hanna, viðrar ekki vel fyrir byltingu?  Ég er game.

[Hildur Helga Sigurðardóttir, 15.7.2008 kl. 19:23]

Alveg er þetta með ólíkindum.   Hvað varð um gamla frasann "Hreint land, fagurt land" ?

Það myndi nú heldur varla kosta nema svosem eina ráðstefnuferð opinbers ferðamálafrömuðar til Langtbortistan að reisa nokkra kamra þar sem þeirra er mest þörf.

[Bumba, 15.7.2008 kl. 23:30]

Ja, hættu nú að snjóa, ljótt er að heyra. Kannski er enginn til þess að líta eftir þessum nauðsynlegu hlutum. Legg til að verði stofnað Kammerráð eða öllu heldur Kamarráð, þótti flottur titill hér áður fyrr, kannski fólk glepjist þá á að vinna þessa eftirlitsvinnu með þessum titli, eða þannig, . Með beztu kveðju.

[Hrafnhildur Ýr Vilbertsdóttir, 16.7.2008 kl. 07:19]

Ég veit fyrir víst að ferðamálastofu skortir fjármagn frá ríkinu, þeir fá 50 milljónir á ári en þurfa 200 milljónir til að standa straum að þeirri uppbyggingu sem þarf miðað við þá aukningu á ferðamönnum sem orðið  hefur undanfarin ár.

Ferðamálastofa hefur haft þá reglu að  til að nýta fjármagnið sem best þá sjá þeir um stofnkostnað en rekstraraðilar svæðanna sjá um reksturinn, vandinn er hins óviðunandi og í raun liggur hann í því að meiri pening skortir frá ríki....

[Hrafnhildur Ýr Vilbertsdóttir, 16.7.2008 kl. 07:26]

já og varðandi salernin við djúpalón, þá hafa þau verið biluð af og til á 2 árum en ekki alveg í 2 ár enn eru komin í lag núna.....Ólöf ýrr og aðrir starfsmenn vinna gott starf en eru háð því litla fjármagni sem þeir hafa...