Græðgisvæðingin - varist endurtekningar!

Ég birti þessa færslu 10. október - það var sennilega of snemmt. Sjálfsagt voru fáir farnir að gera sér grein fyrir því þá hve alvarlegt ástandið væri. Það er full ástæða til að birta þetta allt aftur og vara við. Nú hefur komið í ljós að auðmennirnir sem gerðu þjóðina gjaldþrota eru að sölsa undir sig eignir - aftur - þeir fá skuldir afskrifaðar og koma undan feldi eins og óspjallaðar meyjar. Líka skuldsettir útgerðarmenn sem fengu auðlind þjóðarinnar gefins, léku sér með hana og veðsettu hana rétt eins og aðrir fengu bankana upp í hendurnar og keyrðu þá - og þjóðina - í þrot á örfáum árum.

Við VERÐUM að standa vörð um orkuauðlindirnar svo þær fari ekki sömu leið! Þarna segir m.a.: The rules will need to be rewritten - það verður að setja nýjar reglur. Er verið að því? Er einhver á þingi að beita sér fyrir því að setja ný lög og reglur svo sami leikurinn geti ekki endurtekið sig? Ég hef ekki orðið vör við það. Hvað er að gerast með Hitaveitu Suðurnesja og Geysir Green Energy? VARÚÐ! En hér er færslan - texti og myndbönd. Í öllum bænum gefið ykkur tíma til að horfa og hlusta:

 _____________________________________________

10.10.2008

Viltu verða ríkur? Svona gerum við...

Þátturinn The Greed Game sem sýndur var á BBC nýverið vakti mikla athygli. Í honum er farið yfir aðferðir hinna ofurríku við að græða peninga, ótrúlegar fjárhæðir, aðstöðunni sem þeir hafa skapað sér með aðstoð góðra manna og í hvað þeir eyða peningunum. Þátturinn virðist vera gerður eftir að "efnahagshrunið mikla" hófst og í honum kemur ýmislegt fram sem er fróðlegt að vita. Gera má ráð fyrir að hinir íslensku auðmenn eða "útrásarvíkingar" hafi notað svipaðar aðferðir þegar þeir komu ár sinni fyrir borð um leið og þeir stóðu að hruni íslensku bankanna og  þjóðarinnar allrar.

Lokaorð þáttarstjórnanda eru athyglisverð: "So there are still plenty of opportunities for the super-rich to increase their fortunes. Even though the global financial system is in intensive care and our prosperity is threatened. With the Greed Game still being played, if we're not going to end up losers again, the rules will need to be rewritten." Það sem á undan kom sýndi fram á að þessir menn geta haldið áfram græðgisleiknum nánast  endalaust miðað við þann skort á regluverki sem ríkir. Er ekki rétt að benda íslenskum stjórnvöldum á þetta?

Þátturinn er hér í 7 hlutum svo fólk getur farið rólega í þetta og tekið einn í einu. Neðst er síðan skýringarmynd úr sænsku netblaði sem sýnir a.m.k. hluta eignatengsla íslensku auðjöfranna. Mér finnst nú samt að einhverja og eitthvað vanti inn í þetta net. En hvað varð af þessum mönnum? Geta þeir nokkurn tíma látið sjá sig á landinu framar.

1. hluti

 

2. hluti

 

3. hluti

 

4. hluti

 

5. hluti

 

6. hluti

 

7. hluti

 

Athugasemdir

[Rakel Sigurgeirsdóttir, 19.12.2008 kl. 12:40]

Lára Hanna! Þakka þér fyrir allt þitt óeigingjarna starf sem þú hefur lagt á þig við að viðhalda vöku okkar. Ég verð að viurkenna að ég hef ekki komist yfir að skoða allt það sem þú hefur sett hérna inn á síðuna þína. Hins vegar er ég búin að ákveða að taka a.m.k. einn dag í það núna í jólafríinu og renna yfir færslurnar þínar aftur til mánaðamóta október/september a.m.k. Þátturinn hér að ofan er eitt af því sem mér sýnist að fari á forgangslista í þeirri yfirferð.

[Arnór Valdimarsson (IP-tala skráð) 19.12.2008 kl. 14:50]

 Sæl og takk enn og aftur fyrir frábæra síðu.

Mátti til með að setja hér neðan "fréttaskot" sem fjölmiðlar virðast ætla að þegja í hel. 

Kröfur verði felldar niður að hluta

''Skilanefnd Landsbankans ætlar að fella niður hluta þeirra krafna sem bankinn hefur á sjávarútvegsfyrirtæki vegna gjaldeyrisskiptasamninga. Niðurfelling krafna lendir að lokum óbeint á skattgreiðendum segir fyrrverandi starfsmaður bankans. Þetta kom fram í kvöldfréttum Sjónvarps.

Fram kom í fréttum Sjónvarps að samtals nemi skuldir sjávarútvegsfyrirtækjanna við Glitni, Landsbankann og Kaupþing á bilinu 25-30 milljarða kr. Landsbankinn á rúman helming krafnanna, eða 18 milljarða kr.''

Ef þetta er ekki þjófnaður á þjófnað ofan þá veit ég ekki hvað. Var ekki nóg að þetta pakk fékk kvótann okkar, þjóðarinnar gefinn. Eigum við nú að fara að borga lánin sem þetta hyski tók út á hann, braskaði, gamblaði og tapaði. Ég er fuuuurius! !!

Ég er að komast í það skap að grýta þetta lið einhverju alt öðru en snjóboltum. 

Er ekki kominn tími til að reisa þeim gapastokka á Austurvelli?

[Arnór Valdimarsson (IP-tala skráð) 19.12.2008 kl. 15:03]

Fréttina hér ofan birti MBL rétt fyrir 22:00 í gær kvöld en aðeins í örfáa klukkutíma.

[Hákon Jóhannesson (IP-tala skráð) 19.12.2008 kl. 15:03]

Jæja nú var ég að lesa á mbl.is um enn einn bakreikninginn sem við fáum vegna þrotabús einkahlutafélagsins Landsbankans m.a. vegna Icesave ruglsins - ÍSK 150.000.000.000.

Eigendur Landsbankans sáluga höfðu greinilega rangt fyrir sér um eignastöðu bankans fyrir stuttu; enda er nú til of mikils ætlast að menn þar á bæ hafi haft minnstu hugmynd um stöðu eigna sinna.

Þriðja greiðsluseðillinn á mínum hlut óreiðunnar kemur inn um lúguna hjá mér í Kópavogi eftir áramótin til greiðslu.  Greiðsluseðlinum mun fylgja skrifleg hótun um vexti og álag ef ég stend ekki persónulega skil á greiðslu fyrir gjalddaga.

Skrítið þó - en kemur þó heldur ekki á óvart - að sjá að það hafi ekki verið sendur reikningur að tilstilli ráðamanna þjóðarinnar á f.v. bankastjóra og stjórnendur Landsbankans gamla.  Eftir því sem ég veit best voru þeir á árangurstengdum launum vegna þessarar innlánsstarfssemi úr vösum almennings hérlendis og erlendis. Þarf ekki að skoða þetta Lára Hanna ? En við sjáum til, kanski er þetta bara allt saman misskilningur hjá mér ?

Sé þetta reyndin: Fá þeir - eða bjóðast til sjálfviljugir - að vera með, svona í anda jólanna?.  Verði það raunin kæmi það mér líka verulega á óvart m.v. það sem á undan er gengið.

Varðandi áframhaldið Lára Hanna sem þú minnist á er nú varla hægt að ætlast til þess að þessir snillingar leggji árar í bát núna, komnir á þetta líka fína skrið. Hvítþvegnir eru þeir í dökkum röndóttum jakkafötum, regluverkið í fínu formi fyrir þá og meðvindurinn í seglin. Þeir halda áfram.

Lífið er fullt af skringilegum uppákomum og ekki alltaf sanngjarnt.

Loks hvet ég alla til að blogga eða taka þátt í umræðunni á annan hátt; það er nefninlega langur vegur framundan.

Kveðja Hákon Jóhannesson

[Friðrik Óttar Friðriksson, 20.12.2008 kl. 00:56]

Takk kærlega fyrir fínan vef og kjarngott efni.  Þetta var mjög fróðlegur þáttur og þarfar ábendingar í skrifunum þínum.   Því miður virðast ósköpin rétt að byrja hér og kurteis mótmæli virðast ekki skila miklu.  Allar umræður hér á netinu eru því mjög brýnar, því fjölmiðlar ritskoða allt of mikið.

Við erum að upplifa hvað við erum orðin miklir þáttakendur í alþjóðlegum straumum.  Hlutirnir hafa breyst með ógnarhraða.  Það afsakar ekki neitt hvað "ábyrgir" aðilar í fjármálageiranum hafa innleitt hér eða í hvaða stöðu þeir hafa komið þjóðinni í heldur þvert á móti.  Það undirstrikar einnig ástæðuna hvers vegna við þurfum að taka okkur stöðu í samfélagi þjóðanna með ábyrgari hætti, því þetta er alþjóðlegur fjandi. 

Við ættum þó að hafa allar forsendur til að taka á okkar mönnum og bjarga því sem bjargað verður.  Það á ekki að gefa þessum aðilum krónu eftir.  Í stað þess að láta þúsundir atvinnulausra borgara vinna atvinnubótavinnu við sprotafyrirtæki sem þessir fjandar kaupa svo upp um leið og sprotarnir eru farnir að dafna, þá ætti að dæma þessa aðila til þjóðnýtingar, til að afla þeirra fjármuna til baka sem þeir hafa glatað.  Hvorki heimilin né fyrirtækin geta beðið hvítþvottar í heilt ár.

Ef ekki verður sett þak á verðtryggð lán strax fyrir áramót er mikil hætta á að bilið í samfélaginu okkar muni breikka mjög hratt.  Fjármagn verður á örfárra höndum og megnið af þjóðinni verður sett í varanlega skuldafjötra.  Þjóð í skuldafjötrum mun veita mun minna viðnám við enn grófari yfirtökum þessarra aðila, sem vita ekki hvað siðferði eða samviska er og þá eru auðlindir okkar vissulega í hættu, bæði mannauðurinn og náttúruauðlindir.

Þitt fína innlegg er mjög þarft í beinskeitta umræðu um stöðu mála.  Áfram Lára Hanna!

[Sigurður R. Þórarinsson (IP-tala skráð) 20.12.2008 kl. 01:12]

Það er alltaf fróðlegt að lesa bloggið þitt Lára Hanna.  En að lesa þetta, ofangreint, fyllir mann örvæntingu fyrir hönd unga fólksins og líka ófædda fólksins.  Þegar ég las þetta allt yfir kom upp í hugann... FÖÐURLANDSSVIKRAR yfir þessa menn sem kallaðir eru AUÐJÖFRAR og ÚTRÁSARVÍKINGAR o.fl.o.fl.  Ég er líka að tala um marga ráðherrana og þingmennina sem láta glepjast af peningum. En  "margur verður af aurum API"  og það á svo sannarlega við hérna á Fróni þessa daganna. Ef einhver stelur smáhlut í búð er það skilyrðislaus kært til lögreglu.   En að setja heila þjóð á hausinn virðist ekki refsivert.

[Ívar Örn Reynisson (IP-tala skráð) 20.12.2008 kl. 18:28]

Miðað við þennan þátt þá virðist fjármálaheimur Vesturlanda vera hruninn og aðeins endanlegt fall eftir. Sem kemur á næstu mánuðum og árum. Það er klárt mál að við erum ekki farin að sjá nema brot af því sem á eftir að sjást a.m.k. næstu 3-5 árin. Við þurfum núna að fara út í sveitirnar og sjávarþorpin og framleiða mat til neyslu innanlands. Atvinnuleysi mun fara upp í 15-20% á landinu. Það er klárt mál að lánveitendur íslenska ríkisins munu gjaldfella lán á þriðja ári verulegs viðskiptahalla. Stóð ekki til að borga lán IMF til baka 2012? Ekki séns að við höfum efni á því. Mér er svosem skítsama hvað verður um þetta lið sem er ábyrgt fyrir þessu. Þeir eiga fullt af eignum sem eru einskis virði núna. Við þurfum að hreinsa til í fjármálalífinu og stjórnmálum og það verður gert á næsta ári. Við þurfum að breyta um kerfi og siðferðisvitund. Við þurfum að ala upp betri þegna en við höfum gert og þurfum að rísa upp sterkari en áður. Takk fyrir frábært blogg og gleðileg jól.