Sárabindi á blæðandi sálir

Það er einhver doði í þjóðinni eftir að nýja ríkisstjórnin tók við. Fólk andaði léttar, sem var gott, en baráttunni er engan veginn lokið - hvað allir athugi. Það er óralangt í land - og mikil vinna og aðhald fram undan. Ef við stöndum ekki vaktina verður allur árangur sem náðst hefur unninn fyrir gýg og allt fer í sama spillingar-, sukk- og sjálftökufarið og áður. Enda atvinnustjórnmálamenn komnir í sínar ómálefnalegu skotgrafir og byrjaðir að reyna að tryggja sér áframhaldandi setu við kjötkatlana. VARÚÐ!

Nú er rúmur mánuður síðan síðasti borgarafundur var haldinn í Háskólabíói, en það var 12. janúar. Síðan hafa verið haldnir borgarafundir á Selfossi og  Akureyri. Mig dauðlangaði að fara á fundinn á Akureyri fyrir viku en komst ekki. Hann fjallaði nefnilega um landráð. Eðalbloggarinn Rakel Sigurgeirsdóttir skrifaði ítarlega um fundinn hér og ég hnuplaði myndinni frá henni.

Ég hef ekki lesið lögin um landráð en orðið sjálft er nokkuð augljóst og orðabókin mín segir "brot gegn öryggi eða sjálfstæði ríkis út á við eða inn á við; föðurlandssvik". Ansi er ég hrædd um að við gætum nefnt fjölda manns sem þetta á við um - sem eru þá landráðamenn. En lagabókstafurinn skilgreinir þetta líklega nánar.

Ég komst heldur ekki á síðasta fund í Háskólabíói vegna veikinda og var miður mín yfir því. Þessir fundir, og laugardagsfundirnir á Austurvelli, eru nefnilega svo hollir fyrir sálina. Mér líður ekki vel, vægast sagt. Ég er kvíðin, reið, sár, dofin og hrædd... eiginlega skelfingu lostin, svo einhverjar tilfinningar séu nefndar. Mótmælafundirnir á Austurvelli og borgarafundirnir virka svolítið eins og sárabindi á blæðandi sálina. Mér líður alltaf betur á eftir. Þótt ég sé í eðli mínu einfari og rekist illa í hópum er svo gott að finna nærveru alls þessa fólks sem er í svipuðum sporum og maður sjálfur og líður eins, samkenndina og samstöðuna sem ríkir á þessum fundum. Finna styrkinn sem samstaða fjöldans skapar. Það er einstök upplifun sem enginn má missa af. Og það er ekkert mál að koma einn á þessa fundi. Það þarf ekki að hafa einhvern með sér og láta mætingu ráðast af því. Bara mæta og finna, að við erum þarna öll saman.

En mótmæla- og borgarafundir eru hreint ekki aðeins sárabindi á okkar blæðandi sálir. Þeir eru líka farvegur fróðleiks, upplýsinga og þrýstings á yfirvöld. Í kvöld klukkan átta verður haldinn 10. borgarafundurinn í Háskólabíói. Yfirskrift fundarins er Staðan - Stefnan - Framtíðin. Frummælendur eru Haraldur Líndal Haraldsson, hagfræðingur, sem var í Silfri Egils í gær - sjá Vettvang dagsins hér. Andrés Magnússon, geðlæknir, sem var í Silfrinu - sem oftar - t.d. hér. (Ég hef oft minnst á Andrés. Hann einn og sér er sárabindi á sálina). Þriðji frummælandinn er svo Aðalheiður Ámundadóttir, laganemi. Ég kannast því miður ekki við að eiga efni um hana.

Vonandi verður sjónvarpað og/eða útvarpað frá fundinum svo hin þrjúhundruðogeitthvaðþúsundin sem komast ekki geti fylgst með. Að minnsta kosti verður að taka upp og útvarpa eða sjónvarpa eftirá. Það er  algjört lágmark því þessir fundir eru fyrir alla þjóðina, ekki bara þá sem rúmast í Háskólabíói.

Ef þið viljið rifja upp síðasta fund í Háskólabíói er hann allur hér. Sjáumst!

Athugasemdir

[Hólmdís Hjartardóttir, 16.2.2009 kl. 02:05]

Kemst því miður ekki á morgun.

En ábendingin er þörf við megum ekki sofna......

[Rakel Sigurgeirsdóttir, 16.2.2009 kl. 02:19]

Takk fyrir hrósið Lára Hanna Ég er þér svo hjartanlega sammála í sambandi við það að mótmælenda- og borgarafundir eru sárabindi fyrir blæðandi sál mína sem þjáist vegna þeirra landráða og drottinssvika sem hér hafa verið framin.

Hér á Akureyri lognuðust laugardagsmótmælin því miður út af eftir „dráttarvélarmótmælin“ en það hljóp hins vegar kraftur í borgarafundina. Miðað við mætinguna á síðasta borgarfund (sem ég hef ekki enn komið í verk að segja frá á blogginu mínu en vonandi verður af því á þriðjudaginn) þá gæti farið eins fyrir þeim. En af því að ég er alltaf svo bjartsýn þá trúi ég ekki slíku fyrr en ég horfi upp á það!

Það má bara ekki verða! Þeir sem hafa vaknað mega ekki lognast út af aftur því eins og þú segir: „Ef við stöndum ekki vaktina verður allur árangur sem náðst hefur unninn fyrir gýg og allt fer í sama spillingar-, sukk- og sjálftökufarið og áður.“!

[Jóna Kolbrún Garðarsdóttir, 16.2.2009 kl. 02:46]

Ég hef því miður ekki komist á einn borgarafund, þar sem ég er alltaf að vinna á mánudagskvöldum.  En fundirnir hafa verið góðir, allavega það sem ég hef heyrt af þeim.    Það má ekki láta deigan síga, mótmælin verða að halda áfram. 

[Sævar Helgason, 16.2.2009 kl. 08:05]

Rétt hjá þér Lára Hanna.  Það hefur orðið ákveðið spennufall eftir að við losnuðum við hrunstjórnina sem ráðið hafði gangi mála í 20 mánuði- sofandi.  Núna um sinn eða fram yfir kosningar heldur Jóhanna Sigurðardottir, forsætisráðherra um stjórnvölinn. Þjóðin treystir henni - en á alþingi eru skuggabaldrar sem reyna að bregða fæti fyrir nauðsynlegar breytingar í lýðræðisátt og til siðvæðingar .  Ef við höfum ekki varann á og höldum aðhaldinu og baráttunni áfram- þá er mikli hætta á að allt sæki í sama farið. Við höfum séð "nývæðingu flokka" með nýju fólki- siðbót - en þegar kemur til alvörunnar á alþingi , þá glittir fljótt í gamla drauga sem engu ætla að breyta.... Við verðum að halda vöku okkar .

Fyllum Háskólabíó í kvöld , mánudaginn 16.febrúar 2009 kl 20.....

[Katrín Snæhólm Baldursdóttir, 16.2.2009 kl. 11:42]

Sjáumst í Háskólabíói....já ég er sammála því að það að koma saman og mótmæla og ræða hvernig komið er og hvað aleiðir eru til bóta...hjálpar virkilega upp á sálarlífið. Og gefur manni líka ákveðna innsýn á hvað raunverulega samstaða er og hvernig maður finnur fyrir henni í hjartanu.

[TARA, 16.2.2009 kl. 16:05]

Þetta er góður pistill hjá þér og fundurinn var meiri háttar

[Árni Gunnarsson, 16.2.2009 kl. 17:03]

Aðalheiður er laganemi (gæti verið komin með málafærsluréttindi) Hún hefur skrifað prófritgerð um kærumál sjómannanna tveggja sem þeir reistu gegn ríkinu og dómsúrskurðinn sem þeir skutu til Mannréttindadnefndar SÞ og fengu úrskurð um að stjórnkefi okkar í fiskveiðum væri brot á mannréttindum. Ég hef fyrir satt að þessi ritgerð hafi fengið hæstu einkunn sem gefin er.

En mannréttindabrot hafa verið afþreyingarefni stjórnvalda nú um nokkurra ára bil.   Ekkert bendir til að núverandi sjávarútvegsráðherra hafi skilning á þessu tiltekna máli. Aftur á móti hefu hann lýst því yfir að það sé ekki skynsamlegt að hrófla við þeim forréttindum kvótaeigenda að vera lénsherrar yfir fiskimiðum þjóðarinnar.

Afar undarleg afstaða stjórnmálamanns af vinstri væng. 

[Anna , 16.2.2009 kl. 17:49]

Þeir sem horfa á í fjarðlag enn eiga rætur að rekja til heimalands eru orðlausir. Ég skil þig mjög vel,  þjóðin er eins og gapandi sár og það blæður úr sári þess. Mörgum liður mjög illa. Fólk hefur hringt í mig og grátið í símann yfir öllu saman. Það er búið að missa alla von og sér enga framtíð á Íslandi lengur. 

Það ófyrirgefanlegt hvernig menn fóru og fengu að fara með þjóðina.

[Guðný (IP-tala skráð) 16.2.2009 kl. 19:39]

Er fjárhagslegt valdarán AGS gagnvart Íslandi fólgið í því að lána þjóðinni stórt myntkörfulán og tryggja að hún geti ekki borgað til baka?

Gjaldeyrishöft eru leyfð af sjóðnum til loka 2010 eða á meðan við erum að fá lánið afgreitt í nokkrum skömmtum. Eftir það eða vel áður en við þurfum að borga lánið til baka er krónunni fleytt með (vonandi ekki) hörmulegum afleiðingum fyrir krónuna.

Ef svo vel vill fyrir íslendinga að krónan lifi af flotið að þá hefur sjóðurinn ákvæði um breytilega vexti sem hann hefur hingað til notað til að tryggja að ríki geti ekki greitt til baka og þurfum við þá ekki að setja auðlindirnar upp í skuld?

Hér er hrollvekjandi smantekt um AGS: http://birgitta.blog.is/blog/birgitta/entry/805537/

Við megum ekki gefast upp og þurfum að berjast með kjafti og klóm til að lágmarka skaðann sem er skeður, en hvað er til ráða til að vernda auðlindir landsins gagnvart erlendum lánardrottnum?

[itg (IP-tala skráð) 16.2.2009 kl. 22:30]

Í ljósi umræðu um AGS og viðlíka...af hverju getur ekki núverandi stjórn gefið út ábyrgar tölur um skuldir þjóðarinnar ( með útskýringum ) frekar en sú síðasta.  Hvað er í gangi??

Fólk talar um valdarán AGS, 500 milljarða skuld, 1000 milljarða, 1500 milljarða allt upp í 3000 milljarða skuld.  Það hlytur að vera hægt að nálgast einhverja tölu??? 

[Jóhann Gunnar (IP-tala skráð) 16.2.2009 kl. 22:56]

Alltaf jafn fáranlegt að þeir sýni ekkert frá þessu í sjónvarpinu.

[Katrín Snæhólm Baldursdóttir, 17.2.2009 kl. 11:33]

Aðalheiður ámundadóttir var algerlega frábær og ég vildi að ræða hennar sem hún flutti á borgarafundinum í gær næði til allra íslendinga sem fyrst!!!!! Athugið hvort hún sé komin á www.borgarafundur.org