Hafa ráðamenn ekkert lært?

Ég fjallaði um auðlindasöluna í pistlinum á Morgunvaktinni síðasta föstudag. Hlutirnir gerast nú hratt og þrýst er á um enn meiri hraða. Við eigum að afsala okkur orkuauðlindinni á Reykjanesi án umhugsunar. Þetta eru fáránleg vinnubrögð. Ross Beaty, forstjóri Magma Energy og talsmaður skúffufyrirtækisins Magma í Svíþjóð líka, segist vilja arðræna íslensku þjóðina í fullri sátt við hana. Bjartsýnn maður, Beaty.

Á Vísi er sagt að Samfylkingarfólk sjái mikla annmarka á að ríkið kaupi hlut Orkuveitu Reykjavíkur í HS Orku - þann hinn sama og Beaty vill kaupa - og AGS gæti haft eitthvað við það að athuga. Þetta ítrekar síðan Eyjan í skelfilegri frétt. Hjartað í mér tók kipp - en þetta passar samt alveg við það sem okkur hefur verið sagt um AGS. Skoðið t.d. þetta, horfið á þetta og meðtakið þetta. Óhugnanlegt. Þetta má ekki gerast.

Ég fór á samstöðufundinn í Grindavík í gærkvöldi sem ég sagði frá hér. Hann var fjölmennur og afar fróðlegur. Erindi Guðbrands Einarssonar, bæjarfulltrúa minnihlutans í Reykjanesbæ, var sérlega athyglisvert og glærusýning hans er hér. Hengi hana líka neðst í færsluna. Fram kom í máli Guðbrands að ótrúlega margt er gruggugt við samninga Reykjanesbæjar, kaup, sölu, eignarhald, lánamál og margt fleira. Eftir að hlusta á Guðbrand spurði ég sjálfa mig forviða hvernig þetta hafi getað gerst! Þetta er svo sannarlega ein, stór svikamylla. Lesið um skuggaverkin hjá Agnari Kristjáni.

Á fundinum settu margir spurningamerki við fjárhagslegt hæfi Geysis Green Energy til þátttöku í milljarðaviðskiptum með tilheyrandi fjárhagslegum skuldbindingum. Fyrirtækið er mjög skuldsett og sumir helstu eigenda þess eru í meðferð skilanefnda gömlu bankanna. Forsvarsmenn fundarins fá áheyrn fjármálaráðherra í dag og það verður fróðlegt að heyra hvað hann segir.

Fundurinn  samþykkti einróma eftirfarandi yfirlýsingu: " Samstöðufundur haldinn í Grindavík þann 25. ágúst 2009 skorar á ríkisstjórn Íslands og sveitarfélög að koma í veg fyrir að fram gangi kaup Magma Energy á hlutum í HS orku og tryggja þannig áframhaldandi opinbert eignarhald á þriðja stærsta orkufyrirtæki landsins. Framsal auðlindarinnar í jafn langan tíma og gert er ráð fyrir í tilboði Magma ber að líta á sem varanlegt auk þess sem því fylgir augljós áhætta á að auðlindin verði uppurin að framsalstímanum liðum. Við þær aðstæður sem nú eru uppi í þjóðfélaginu er brýnt að lausafjárvandi samfélagsins sé ekki leystur með bráðræðislegum gjörningum þar sem stórum hagsmunum er fórnað. Fundurinn vill því heita á ríkisstjórn Íslands að standa vörð um sameiginlegar auðlindir landsmanna með langtíma hagsmuni þjóðarinnar að leiðarljósi þar sem við ráðstöfun og nýtingu sé horft til þess að hámarka samfélagslegan og þjóðhagslegan ávinning af auðlindinni í sátt við náttúruna."

Ef það er rétt sem Vísir og Eyjan segja, að AGS þrýsti á um söluna og banni ríkinu (les. almenningi) að eiga auðlindir sínar og njóta arðsins af þeim verðum við að losa okkur við AGS. Svo einfalt er það. Eignaupptaka heilu þjóðanna er sérgrein sjóðsins og Íslendingar virðast vera næstir. Það sem mér sárnar einna mest er að nokkrir Íslendingar taka þátt í plottinu með sjóðnum. Væntanlega sjá þeir gróðavon fyrir sjálfa sig og þeim virðist vera skítsama um okkur hin og afkomendur okkar. Maður spyr sig hvað þeir fá mikið í aðra hönd fyrir auðlindasöluna. Gleymum ekki því sem kom fram í myndinni The Big Sellout (Einkavæðingin og afleiðingar hennar). En hér er Morgunvaktarpistillinn frá 21. ágúst.

Ágætu hlustendur...

Nú er vindurinn farinn að gnauða úti fyrir, haustið er í augsýn og farið að skyggja enn á ný. Við þurfum að kveikja ljósin fyrr og hækka hitann á ofnunum. Rafmagn og hiti eru meðal grunnþarfa samfélagsins og við værum illa stödd án orkunnar og heita vatnsins.

Við erum heppnir, Íslendingar. Við eigum auðlindir sem veita okkur orku og heitt vatn til húshitunar og annarra grunnþarfa. Þótt ekki sé hægt að segja að við höfum alltaf farið vel með orkuauðlindir okkar, höfum við þó hingað til getað kennt okkur sjálfum um. Þær hafa verið í okkar eigu.

Fyrir tveimur árum tók bæjarstjóri Reykjanesbæjar fyrsta skrefið í að selja þessa sameign þjóðarinnar og grunnstoð samfélagsins einkaaðilum. Það var í samræmi við frjálshyggjustefnu ráðandi afla í bæjarstjórn og landsmálum - allt átti að einkavæða. Helst einkaVINAvæða eins og bankana. Þriðjungur í Hitaveitu Suðurnesja var afhentur einkaaðilum. Álver í Helguvík var á dagskrá og menn sáu mikla gróðavon í orkunni - og gera enn.

Haustið 2007 var fróðlegt viðtal um 'íslenska efnahagsundrið' við Hannes Hólmstein Gissurarson, frjálshyggjupostula Íslands og einn arkitekta gróðahyggjunnar. Honum var þar tíðrætt um dautt fjármagn - fé án hirðis. Verðmæti sem voru lífguð við með því að afhenda þau einkaaðilum og leyfa þeim að veðsetja þau. Við vitum öll hvernig það endaði. Bankarnir hrundu og auðlindir sjávar eru veðsettar upp í rjáfur. Enda hafa kvótakóngar og bankamenn  það bara bærilegt, hafa svifið um loftin blá í þyrlum og einkaþotum og hlaðið vel undir sig og sína.

En frjálshyggju- og einkavæðingarsinnar eru aldeilis ekki hættir. Nú stendur til að feta í fótspor bæjarstjórans í Reykjanesbæ og selja enn stærri hluta orkuauðlinda frá þjóðinni. Útlendingar eru komnir á bragðið - þeir finna eflaust peningalyktina. Fyrsta skrefið var tekið 2007 og með dyggri aðstoð íslenskra ráðgjafafyrirtækja er Orkuveita Reykjavíkur um það bil að stíga næsta skref. Ef það skref verður stigið munu einkaaðilar, þar á meðal kanadíska skúffufyrirtækið Magma í Svíþjóð, eignast nærri helmingshlut í allri orkuvinnslu á Reykjanesi. Hlutnum fylgja afnot af orkuauðlindinni í allt að 130 ár. Í 130 ár, um það bil fimm kynslóðir Íslendinga, munu erlendir og innlendir auðmenn geta blóðmjólkað auðlindina - ef hún endist svo lengi.

Iðnaðarráðherra Samfylkingar er hlynntur þessari aðför að auðlind þjóðarinnar og ber fyrir sig tæplega ársgömlum lögum um að auðlindin sé í þjóðareign. Hvað stoðar það þegar yfirráð yfir henni og afnotaréttur af henni er í einkaeign og arðurinn fer úr landi? Endar jafnvel á Tortólum heimsins.

Ráðherra ber líka fyrir sig að gott sé að fá erlent fjármagn inn í hagkerfið á þessum erfiðu tímum. En hve mikið kemur inn, spyrjum við þá? Heilir 6 milljarðar! Það er rúmur helmingur af bónuskröfum starfsmanna Straums og 12% af skuld Magnúsar kvótakóngs sem talað var um að yrði mögulega afskrifuð. Þvílík innspýting í efnahagslíf þjóðarinnar! Getur ekki einhver með heilbrigða skynsemi komið vitinu fyrir Katrínu Júlíusdóttur og sagt henni söguna af Sigríði í Brattholti?

Hafa íslenskir ráðamenn ekkert lært?

Skrár tengdar þessari bloggfærslu:

• Pistill á Morgunvakt Rásar 2 - 21. ágúst 2009
• Glærusýning á Samstöðufundi í Grindavík 25. ágúst 2009

Athugasemdir

[Sveinn hinn Ungi (IP-tala skráð) 26.8.2009 kl. 13:08]

Ársreikningarnir sýna mikinn hagnað af Orkuveitu suðurnesja. 2,3 milljarðar árið 2006 og 3,5 milljarðar árið 2007. (Sjá myndrænt á mínu bloggi). 

Nú á að selja þetta fyrir 1,7 milljarð + kúlulán með engum vöxtum.

[Gunnar (IP-tala skráð) 26.8.2009 kl. 13:46]

Nú þarf Steingrímur að rifja upp til hvers hann var kosinn á þing, og þjóðnýta eignarhlut orkuveitunnar í HS.

[Grútur (IP-tala skráð) 26.8.2009 kl. 13:57]

Er að lesa "Confessions of an Economic Hit Man" eftir John Perkins. Þar talar hann m.a. um tengsl þeirra sem hann vann fyrir við IMF (þ.e. AGS) auk þess sem hann lýsir því hvernig efnahagsböðlunum er einkum sigað á lönd sem búa yfir auðlindum, sem áætla má að komi til með að hækka gríðarlega í verði næstu 25 árin eða svo. Í þessu sambandi má svo gjarnan rifjan upp ummæli Perkins, þegar hann í Silfri Egils í vetur sagði engan vafa í sínum huga, að Ísland hefði orðið fyrir efnahagsárás.

[Óskar Þorkelsson, 26.8.2009 kl. 14:40]

ég hef verið á þeirri skoðun alveg frá því að IMF kom hér að málum að Landsvirkjun og fyrirtæki skyld Landsvikrjun hafi verið tekin í pant... Þetta Magma dæmi er bara fyrsta dæmið sem styður mína skoðun.. það er nú þegar búið að selja orkuauðlindir landsins..

Sorry Stína.. þú ert ólétt ! 

[Gerður Pálma, 26.8.2009 kl. 15:19]

Allt sem nú er að gerast er í hárréttri braut við það sem fjöldi fólks hefur varað við, VIÐ VISSUM ÞETTA, ALLIR SEM VILJA VITA HVAÐ ER Í GANGI VITA ÞAÐ.  Við hljótum að vera stórlega sködduð andlega að leyfa þessum mannskað að ákveða örlög Íslands án tillits hvorki til lands eða þjóðar. Við vissum hvað til stóð en kusum samt þessa yfirlýstu stefnu Samfylkingarinnar.  Hvernig er hægt við venjulegt fólk að vita hvort við stöndum á höfði eða í fætur?  Okkar helstu baráttumenn Ómar, Mörður og Dofri eru í þeim flokki sem stendur fyrir álvæðingu. 

Mér segir svo hugur að MAGMA sé í sterkum tengslum við RIO TINTO, það verða að koma rekstrarhagræðing í alþjóðlegri álvinnslu...og hvar er auðveldara að eiga við yfirvöld, ódýrari orka og

mútuþægni en á okkar kæra Íslandi? 

Ég legg til að Ísland verði AFLÚSAÐ - Þessar blóðsugulýs sem herja á heilbrigði lands og þjóðar verði sviftar öllum ráðum og völdum í eitt skipti fyrir öll.  þeir sem hlutu Fálkaorðuna fyrir undirbúning aftöku þjóðarinnar skili þeim aftur en fái þess í stað ´mannorðsmissisorðuna´

Hver einasti þingmaður verði að SVERJA hollustu við land og þjóð Í VIÐURVIST ÞJÓÐARINNAR í beinni útsendingu, það er hægt að skipuleggja það með sama glæsibrag og söfnunin vegna Tsunami var gerð, nú er Tsunami á Íslandi og við sogumst öll með ef við spyrnum ekki á móti.

[Anna Einarsdóttir, 26.8.2009 kl. 16:25]

Ég endurtek orð Gunnars (komment 2)

Nú þarf Steingrímur að rifja upp til hvers hann var kosinn á þing, og þjóðnýta eignarhlut orkuveitunnar í HS.

[Guðmundur Guðmundsson, 26.8.2009 kl. 19:57]

Það er sjálfsagt að brýna Steingrím til dáða enda er hann manna líklegastur til þess að hugsa um hagsmuni almennings, en ég hvet alla til þess að hafa samband við þingmenn og ráðherra SAMFYLKINGARINNAR vegna þessa máls. Með einhverjum ráðum verður að stöðva stóriðjupostulana á þeim bæ, Katrínu Júlíusdóttir, Árna Pál, Björgvin G...

Ólína Þorvarðardóttir, Dofri Hermannsson, Ómar Ragnarsson hafa andmælt en hvers vegna heyrist ekki múkk í öðrum áhrifamönnum í Samfylkingunni?

[Sigríður Lára Sigurjónsdóttir (IP-tala skráð) 26.8.2009 kl. 20:02]

Er að horfa á Magmanninn í Kastljósinu. Eftir að hafa horft á Zeitgeist myndirnar fyrir skemmstu rennur mér kalt vatn milli skinns og hörunds. Hvernig ætli ástandið sé í löndunum þar sem þessi maður starfrækir silfurnámur?

Ég hef einstaklega illar bifur á honum þessum. Og AGS, bæðevei.

[Fríða Eyland, 26.8.2009 kl. 20:13]

þakka þér Lára Hanna fyrir frábæra samantekt.

Það er alveg magnað hvernig nokkrir leppar virðast leynt og ljóst vinna gegn eigin þjóð, þeir eru landráðamenn sem selja aulindirnar okkar til erlendra glæpafyrirtækja (rio tinto).

Okkur ber að verja landið og auðlindindirnar, við getum það ef við viljum.

[Arnór Valdimarsson (IP-tala skráð) 26.8.2009 kl. 23:19]

Frétt í Vísi í kvöld.

Axlarbrotinn forseti á fundi með Magma

Ólafur Ragnar Grímsson féll fyrir stuttu af hestbaki og axlarbrotnaði.

Ólafur Ragnar Grímsson, forseti Íslands, átti fund með Ross Beaty, forstjóra Magma Energy, fyrr í mánuðinum. Þeir ræddu umsvif Magma, sem hyggst hasla sér völl í íslenskum orkuiðnaði.

Er þetta ekki endapunkturinn með þetta forseta embætti og föðurlandssvikarann sem þar situr. Er hann ekki búinn að kosta þjóðina nóg? 

Stjórnarskrárbeytingar strax!

[Andri Geir Arinbjarnarson, 27.8.2009 kl. 05:37]

Það er mikil gagnrýni hér á Steingrím en ef hann er svona "lélegur" hver er betri til að taka við?

Hver er þessi leiðtogi sem á að rífa landið upp úr þessari kreppu, senda AGS heim, neita að borga Icesave, segja nei við Norðurlöndin, fella niður skuldir,  þjóðnýta atvinnulífið og setja í fangelsi alla sem komu nálægt útrásinni.

Þetta hljómar dásamlega en hvar er mennirnir og áætlunin til að hrinda þessu í framkvæmd? 

[Guðmundur Guðmundsson, 27.8.2009 kl. 08:16]

Skúli Helgason Samfylkingarmaður birtir pistil á heimasíðu sinni um Magma og HS-orku og slær úr og í. Þar segir m.a.

a) Honum finnst tilboðið jákvætt: "Kauptilboð kanadíska fyrirtækisins Magma Energy í eignarhlut Orkuveitu Reykjavíkur er jákvætt í þeim skilningi að ef um semst myndi það fela í sér fyrstu umtalsverðu erlendu fjárfestinguna í íslensku atvinnulífi eftir bankahrunið.  Það er mikilvægt og felur í sér nauðsynleg skilaboð til umheimsins um að íslenskt atvinnulíf sé ekki „holdsveikt“ þrátt fyrir áföllin sem dunið hafa yfir."

b) Tilboðið sé e.t.v. ekkert sérstakt en Samkeppniseftirlitið hafi neytt Orkuveituna til þess að selja... og stingur e.t.v. upp á frestun þar til betur árar (og umhverfissinnar hafa sofnað): "Hafa verður í huga að Samkeppniseftirlitið hafði kveðið upp þann úrskurð að Orkuveitunni væri ekki heimilt að eiga nema 10% hluta í HS Orku og henni var því nauðugur sá kostur að selja.  Hins vegar má spyrja sig hvort það myndi þjóna betur hagsmunum Orkuveitunnar að geta frestað söluferlinu þar til betur árar til á hlutabréfamörkuðum, með það fyrir augum að fá sem hæst verð fyrir hlutinn."

c) Það má skilja það sem svo að honum finnist 65 ára hæfilegur samningstími fyrir nýtingarrétt en ekki sé hægt að fara fram á framlengingu fyrr en árið 2042 (þá verðum við örugglega sofnuð): "Engin heimild er fyrir því í lögum að veita vilyrði fyrir framlengingu við undirritun samnings en handhafi afnotaréttarins á rétt á viðræðum um framlengingu „…þegar helmingur umsamins afnotatíma er liðinn.“  Samkvæmt því kemur möguleg framlenging í þessu tilviki fyrst til umræðu árið 2042."   

d) Skúla finnst útilokað að ríki gangi inn í samningana vegna þess að við séum svo blönk: "Hitt er að mínu mati óraunhæft að ríkið gangi inn í samningana og kaupi sjálft hlut í HS Orku til að koma í veg fyrir aðkomu Magma.  Það myndi kosta ríkið um 12 milljarða króna og slíkt fjármagn liggur sannarlega ekki á lausu og myndi eingöngu kalla á frekari niðurskurð í velferðarkerfinu, hærri álögur á almenning eða hvort tveggja." 

e) Skúli er greinilega skotinn í samningnum við Magma (eða iðnaðarráðherra): "Aðkoma ríkisins á að felast í því að tryggja að almannahagsmunir verði varðir ef af kaupum Magma verður."

 Sennilega er Skúli hér að túlka afstöðu valdamanna í Samfylkingunni. Því spyr ég: „Sætta umhverfissinnar í Samfylkingunni sig við þetta?“

[Alexander (IP-tala skráð) 27.8.2009 kl. 12:22]

 Það var gerð árás á landið og henni er engan veginn lokið. Núna á bara eftir að klára dæmið. Það rísa engin sveppaský til himins við beitingu þeirra vopna sem þetta fólk beitir eins og raunin er með minna hættuleg vopn eins og td. kjarnavopn. Við þurfum jú ekki nema að líta yfir heiminn til að sjá afleiðingarnar af því þegar peningum er beitt sem vopni.