12.12.2008
Baneitraður brandari?
Undanfarnar vikur hefur Morgunblaðið verið ansi öflugt, komið með margar góðar fréttaskýringar og umfjöllun um efnahagshrunið og aðdraganda þess frá ýmsum hliðum. Blaðamenn Moggans hafa stungið á kýlum, flett ofan af spillingu og fylgt málum óvenju vel eftir miðað við þá staðreynd að ótrúlegustu spillingar- og stórmál sem þarfnast umfjöllunar hafa komið upp nánast á hverjum einasta degi. Fleiri síður hafa verið lagðar undir aðsendar greinar þar sem fjölmargir Íslendingar, þekktir og óþekktir, hafa farið á kostum. Fólk hefur gagnrýnt, hrósað og stungið upp á alls konar lausnum. Þar hefur einna mest borið á nýsköpun og sprotafyrirtækjum sem framtíðarlausnum. Fólk hefur verið mestan part málefnalegt og sýnt heilbrigða skynsemi. Óvenju lítið bull hefur slæðst með miðað við fjölda greina. Það má sem sagt margt gott segja um frammistöðu Morgunblaðsins undanfarnar vikur þótt ýmislegt megi auðvitað gagnrýna líka.
Mér brá í brún þegar ég sá stutta grein í heiðursramma í Mogganum í dag. Ef hún hefði verið eftir einhvern óbreyttan úti í bæ hefði ég í versta falli afgreitt hana sem kjánalega. En greinin er ekki eftir mann úti í bæ, heldur fjármálaráðherra Íslendinga, Árna M. Mathiesen. Mann sem hefur gegnt ráðherraembættum árum saman, sýnt af sér fádæma roluskap og spillingu auk þess að hafa sáralítið sem ekkert til málanna að leggja og neita að upplýsa um fjárhagsleg tengsl sín við bankastofnanir. Hann ætlar nú að hækka skatta og ótalmargt fleira sem var m.a. rætt í Kastljósi í gærkvöldi eins og sjá má hér.
En fjármálaráðherra fjallaði ekki um skattamál og ég er ekki alveg búin að átta mig á tilgangi greinarinnar og hvað ráðherranum gengur til með birtingu hennar, en tökum dæmi: "Við uppfærslu fjárlaga er lagður grunnur að framkvæmdum sem í verður ráðist á næsta ári. Skiptir máli að þær séu vel ígrundaðar, og forgangsraðað verði út frá eftirfarandi forsendum: Þær séu arðbærar til skemmri og lengri tíma, séu mannaflsfrekar, bæði á undirbúnings- og framkvæmdatímabili, skapi atvinnu á því svæði þar sem mest hefur dregið úr atvinnuframboði og kalli ekki á mikinn innflutning aðfanga." Hvað er Árni að tala um hér? Þó ekki virkjanir og álver! Þá er hann enn meiri kjáni en ég hélt. Hér hefur komið fram hver sérfræðingurinn á fætur öðrum undanfarnar vikur og varað við slíku óráði sem fælist í því að slá enn fleiri og hærri lán í útlöndum - ef þau þá fást. Þjóðin er gjörsamlega að drukkna í skuldafeni og ekki er á bætandi.
Ég gæti tínt til ótal fleiri ástæður en í bili nægir að nefna eiturefnið brennisteinsvetni sem jarðgufuvirkjanir þær sem áætlað er að reisa til að knýja álverin í Helguvík og á Bakka spúa út í andrúmsloftið. Ég hef skrifað um málið margoft á þessum vettvangi - til dæmis hér, hér, hér, hér og hér svo eitthvað sé nefnt. Í tónspilaranum eru 15 viðtöl við lærða og leika, sérfræðinga og vísindamenn auk fréttaumfjöllunar. Til hægðarauka fyrir þá sem vilja hlusta merkti ég efnið A00 til A14 svo það raðast efst í spilarann. Ég hvet fólk eindregið til að hlusta - og horfa svo á þessar fréttir af RÚV í gær og fyrradag. Þarna er reyndar ekki fjallað um þá hættu sem mannfólkinu getur stafað af brennisteinsvetnismengun - og ég er ekki að tala um lyktmengun. Ætlar Árni að eitra fyrir okkur ofan á allt annað?
Fleira mætti tína til úr þessari litlu grein fjármálaráðherra en hér er hún. Misskil ég greinina kannski - eða þetta brot úr henni sem ég tók út? Og er Árni sá maður sem hefur efni á að hvetja til samheldni og samstarfs? Hefur hann sýnt sig vera verðugan fulltrúa almennings sem fólk ætti að flykkjast á bak við og sýna samstöðu?
Bloggar | Breytt s.d. kl. 17:08 | Slóð | Facebook | Athugasemdir (18)
12.12.2008
Kona er nefnd...
Ég sá viðtal við hana í sjónvarpinu fyrir tveimur eða þremur árum hjá Evu Maríu. Konan heillaði mig gjörsamlega. Ég man ekki eftir viðlíka upplifun af bláókunnugri manneskju. Persónutöfrar hennar, eðlisgreind, gáfur og heilbrigð skynsemi gneistuðu í gegnum skjáinn og inn á gafl hjá mér. Hún talaði um lífið eins og gestir Evu Maríu gera, barnæsku, unglingsár, námsárin í Bandaríkjunum, störf þar og lífið eftir heimkomuna. Ég hafði aldrei heyrt konunnar getið og mér lék mikil forvitni á að vita hver hún væri.
Í viðtalinu kom fram að hún hafi unnið um tíma hjá fyrirtæki þar sem ég þekki til. Ég spurðist fyrir og það var eins og við manninn mælt - þeir sem ég spurði fengu stjörnur í augun þegar ég minntist á hana. Allir söknuðu hennar þótt hún hafi staldrað stutt við, allir dýrkuðu hana og dáðu, sögurnar af henni voru stórkostlegar. Miðað við áhrifin sem hún hafði á mig eftir eitt sjónvarpsviðtal kom það ekki á óvart.
Nokkru seinna var ég í stóru hófi og var kynnt fyrir þessari konu. Ég hrósaði henni fyrir viðtalið og hafði orð á því að ef hún einhvern tíma stofnaði eigin fyrirtæki myndi ég gjarnan vilja vinna hjá henni. Til að árétta að mér hefði verið alvara sendi ég henni tölvupóst daginn eftir og fékk vingjarnlegt svar. Kannski fór hún hjá sér og þótti þetta óþægilegt, hver veit? Kona þessi stofnaði eigið fyrirtæki eins og ég vissi að hún myndi gera, en hún hefur ekki ennþá boðið mér vinnu og ég ekki sótt um. Ég er ekki viss um að bransinn hennar henti mér.
Mér varð hugsað til þessarar konu í kvöld eftir aulahrollinn sem ég gagntók mig við að hlusta á viðtalið við forstjóra Fjármálaeftirlitsins í Kastljósi og aumt yfirklór hans um spillingar- og krosstengsl banka, skilanefnda og endurskoðenda. Þvílíkur munur væri nú ef þessi kona væri þar við stjórn en ekki þessi flóttalegi, óöruggi, hálfstamandi maður sem er svo gjörsamlega vanhæfur í starfi að manni hrýs hugur við þeim völdum sem hann hefur í krafti embættisins. Þetta er það sem hefst upp úr pólitískum mannaráðningum þar sem flokksskírteini er rétthærra en hæfni og hagsmunir Flokksins látnir ganga fyrir hagsmunum þjóðarinnar.
Hér eru nokkur myndbrot með viðtölum við konuna en því miður á ég ekki áðurnefnt viðtal sem ég sá fyrst. Það var gjörólíkt þeim sem birtast hér að neðan, ekkert rætt um pólitík eða fjármál. En ímyndið ykkur það sama og ég - mynduð þið treysta henni betur fyrir allri þeirri ábyrgð og því valdi sem forstjóri Fjármálaeftirlitsins hefur? Eða Seðlabankanum? Ég óttast mest að hún hafi engan áhuga á embættum ríkisins.
Konan heitir Halla Tómasdóttir og stofnaði og rekur ásamt fleiri konum fjárfestingarsjóðinn Auður Capital. Hún hefur unnið að því, og fengið viðurkenningar fyrir, að stuðla að jafnrétti og var ein frumkvöðla að verkefninu Auður í krafti kvenna hér um árið. Ég veit ekki hvort Halla er flokkspólitískt þenkjandi eða starfandi í stjórnmálaflokki en mér er alveg sama. Sem einstaklingur er hún geysilega öflug manneskja sem ég myndi treysta. Gott dæmi um ástæður þess að hafa persónukjör í kosningum til Alþingis og sveitarstjórna - þvert á lista. Hlustið á Höllu í þessum myndböndum.
Hádegisviðtalið á Stöð 2 - 14. mars 2008
Markaðurinn hjá Birni Inga 15. nóvember 2008
Takið sérstaklega eftir hvað Halla segir um stjórn Seðlabankans og varamannssetu sína í henni
Kastljós (ásamt Óla Birni) 18. nóvember 2008
Bloggar | Breytt s.d. kl. 18:47 | Slóð | Facebook | Athugasemdir (22)
11.12.2008
Björgvin G. í brennidepli og stórum dráttum
Björgvin G. Sigurðsson, viðskiptaráðherra, er í brennidepli þessa dagana. Hvort sem það er af hans eigin völdum eða annarra virðist hann ekki hafa verið hafður með í einu eða neinu og heldur ekki fylgst með að eigin frumkvæði. Ekki veit hann sitt af hverju sem átti að vera ljóst og hafði verið á margra vitorði um alllangt skeið. Segir hann satt eða ósatt? Alla ráðherratíð sína hefur hann þó verið með aðstoðarmann í fullu starfi og nú einnig upplýsingafulltrúa - auk starfsfólksins í ráðuneytinu auðvitað. En hann kemur samt hvað eftir annað af fjöllum með hvert málið á fætur öðru, blessaður, enda virðast þeir þrír ekki tala mikið saman af þessu að dæma. Traustvekjandi? Maður spyr sig hvort þessir piltar vinni fyrir laununum sínum - sem við borgum og eru örugglega ekki skorin við nögl.
Ég efast ekki um að Björgvin sé ljúfur drengur, en furða mig æ oftar á því hvaða duldu hæfileikar gerðu hann hæfan í þetta embætti. Hann er ekki einu sinni dýralæknir, hvað þá íþróttakennari. Ekki það að menntun manna skipti öllu máli - ég veðja frekar á heiðarleika, greind og almenna þekkingu og skynsemi. Og hvað er hann búinn að vera að gera í eitt og hálft ár? Ég man best eftir skóflustungunni í Helguvík.
Í tilefni af viðtalinu við Björgvin í Kastljósi í gærkvöldi gróf ég upp fleiri viðtöl úr gullastokknum. Ég ætla ekki að segja margt um þau, dæmi hver fyrir sig um þau orð sem hann lætur falla í þessum viðtölum. Skoðun á hlutunum í sögulegu ljósi er alltaf áhugaverð og undanfarna tvo og hálfan mánuð hafa hlutirnir gerst svo hratt og breyst með hraða ljóssins frá degi til dags þannig að í dag er gærdagurinn orðinn sagnfræði. Öðruvísi mér áður brá.
Fyrsta viðtalið er frá 29. maí 2007, skömmu eftir að Björgvin varð ráðherra. Athygli vekur ákafi hans við að koma í gegnum þingið frumvarpi sem auðveldar útrásarbarónum og bönkunum að leika sér með fjármuni erlendis sem endaði með hundraða milljarða féflettingu sem við og afkomendur okkar þurfum að borga. Ef hann yrði spurður um þetta nú kæmi líkast til þreytta klisjan: "Ég gat ekki vitað á þessum tíma..." o.s.frv. Þó var staða mála á þessum tíma þannig að lokað hafði verið á erlend millibankalán til íslenskra banka og því tóku þeir á það ráð að fjármagna sukkið með sparifé grandalausra útlendinga víða um Evrópu - og okkar peningum. Þetta hefði átt að hringja einhverjum bjöllum einhvers staðar en gerði greinilega ekki. Ráðamenn í siðmenntuðum löndum reka menn og segja af sér fyrir margfalt minni sakir.
Næst kemur viðtal í Mannamáli 11. nóvember 2007. Þarna er Björgvin í góðum félagsskap annars ráðherra ríkisstjórnarinnar, Árna Mathiesen, fjármálaráðherra.
Þá er það Hádegisviðtalið á Stöð 2 frá 18. mars 2008.
Því næst Kastljós 30. september 2008 ásamt Valgerði Sverrisdóttur,
Nú er skammt stórra högga á milli og næst kemur Kastljós 24. október 2008. Þar ræðir Björgvin um fund sinn með Darling.
Hér er svo viðtal í Íslandi í dag 27. nóvember 2008.
Björgvin er hér í Markaðnum hjá Birni Inga 6. desember 2008.
Loks er það Kastljós í gærkvöldi, 10. desember 2008.
Er ég að gleyma einhverju? Ef fólk man eftir fleiri áhugaverðum viðtölum við Björgvin er það vinsamlegast beðið að láta mig vita. Líkur eru á að ég eigi það í fórum mínum en það er svo fjári tímafrekt að leita í öllu þessu efni.
Bloggar | Breytt s.d. kl. 14:01 | Slóð | Facebook | Athugasemdir (34)
10.12.2008
Lögleg svik, spilling og þjófnaður
Í Silfrinu á sunnudaginn var símaviðtal við Jón Steinsson, hagfræðing í Bandaríkjunum, sem var afskaplega athyglisvert og er algjört skylduáhorf og hlustun. Því miður rofnaði símasambandið og náðist ekki aftur fyrr en síðast í þættinum svo ekki er víst að fólk hafi náð því sem Jón var að segja í samhengi. Ég klippti saman viðtalsbrotin tvö til að samtalið kæmi út sem ein heild.
Það sem Jón er að segja er allt í senn óhugnanlegt, ótrúlegt og að því er virðist rétt - því miður. Þetta er nokkuð sem verður að ráða bót á strax - helst í síðustu viku - því þetta er hluti af þeim ógeðslega spillingarleik sem hefur grasserað og er verið að leika í íslensku þjóðfélagi ennþá.
Þeir Jón og Egill nefna Fjárfar, alveg ótrúlega vafasamt skúffufyrirtæki sem var hluti af Baugsmálinu. Ég er búin að kynna mér það mál svolítið - alls ekki nóg samt, þessi mál eru mjög flókin fyrir manneskju eins og mig sem fylgdist aldrei með fjármála- eða viðskiptalífinu - en ég bendi fólki á að kynna sér það endilega hér. Þetta mál er hreint með ólíkindum.
Lokaorð Jóns t.d. eru alvarleg viðvörun - leturbr. og innskot eru frá mér:"Jón: ...allt fólkið sem hefur verið efnað á Íslandi í gegnum tíðina, en er í dag gjaldþrota, er með undraskömmum hætti orðið efnað á ný. Við bara megum ekki láta þetta gerast. Við verðum að hafa alvörueftirlit með því sem er að gerast inni í þessum risastóru bönkum sem nú eru á ábyrgð skattgreiðenda.
Egill: Þú meinar að sömu aðilar geti notfært sér þetta ástand til að ná einhvern vegin aftur undir sig samfélaginu.
Jón: Þeir eru í kjöraðstæðum til þess. Þeir þekkja fyrirtækin, þeir vita hvernig er hægt að búa til einhverja díla sem hljóma eins og þeir meiki einhvern sens fyrir ríkið en eru í rauninni eitthvað allt annað. Og á meðan staðan er þannig að þetta er ekkert allt uppi á borðinu í fyrsta lagi... það eru ekki skýrar reglur um það hvernig sölu eigna og endurmati skulda er háttað innan bankakerfisins... og á meðan þetta er ekki uppi á borðinu þá er þessi hætta til staðar. Þetta eru kjöraðstæður fyrir svona látalæti vegna þess að í dag er erfiðara en nokkru sinni fyrr að átta sig á því hvað sannvirði eigna er.
Egill: Kjöraðstæður fyrir spillingu.
Jón: Kjöraðstæður fyrir spillingu.
Egill: Þú treystir þá ekki því sem er að gerast inni í bönkunum?
Jón: Nei, ég hef miklar áhyggjur af því. Í fyrsta lagi þarf verklagsreglur. En í öðru lagi er bara ekki hægt að komast hjá því að kjörnir fulltrúar þjóðarinnar (innsk.: þingmenn), sem bera ábyrgð gagnvart þjóðinni, séu virkir í eftirliti. Ég hef miklar áhyggjur af því, að það sé ekki þannig - ekki nægilega mikið. Það þarf toppfólk í það. Fólk sem hefur djúpan skilning á fjármálaleikfiminni sem innherjarnir munu bera á borð. Þegar þessi flóknu mál koma á borðið hjá bankaráðum bankanna eða fjármálaráðherra (innsk.: Árna Mathiesen) eða viðskiptaráðherra (innsk.: Björgvin G.) þá þurfum við að hafa aðila í þeirra stöðum sem geta skilið þessa díla til að þeir semji ekki af sér fyrir hönd þjóðarinnar. Ég er því miður ekki viss um það að aðilarnir í þessum stöðum á Íslandi í dag hafi nægilega djúpan skilning á því erfiða verkefni sem er fyrir höndum hjá þeim."
Jón Steinsson í Silfri Egils 7. desember 2008
Hér eru svo tvær nýlegar blaðagreinar eftir Jón Steinsson þar sem hann fjallar um spillinguna á Íslandi. Smellið þar til læsileg stærð fæst.
Fréttablaðið 3. desember 2008
Morgunblaðið 27. nóvember 2008
Bloggar | Breytt s.d. kl. 18:40 | Slóð | Facebook | Athugasemdir (8)
10.12.2008
Áríðandi skilaboð til stjórnvalda!
Egill Helga gaf mér leyfi til að birta þessa færslu sem hann er með hjá sér. Þetta er stórmál sem verður að vekja athygli á - bæði almennings og stjórnvalda.
__________________________________________
10. desember, 2008
Sönnunargögn liggja undir skemmdum
Maður sem ég treysti mjög vel og þekkir vel til í bankakerfinu og viðskiptalífinu sendi mér þetta bréf. Ég tel að upplýsingarnar sem koma fram í því séu svo mikilvægar að nauðsynlegt sé fyrir stjórnvöld að bregðast hratt við.
--- --- ---
Nú eru rúmlega 2 mánuðir liðnir frá því að bankarnir féllu hver á fætur öðrum með tilheyrandi afleiðingum fyrir þjóðarbúið. Allt stefnir í að lög um sérstakan saksóknara verði samþykkt á Alþingi í dag eða næstu daga. Vonandi tekur hann til starfa sem fyrst, en spurningin er hvort skaðinn sé ekki þegar skeður. Samkvæmt mínum upplýsingum liggja sönnunargögn undir skemmdum í öllum bönkunum, þar sem ekki var haft fyrir því að taka heildarafrit hjá hverjum banka fyrir sig og setja afritin í örugga geymslu hjá Seðlabankanum eða Fjármálaeftirliti. Það er því ekki víst að gögnin sýni rétta stöðu, þegar rannsókn fer í gang.
Vandamálið með skilanefndirnar er að þær eru flestar skipaðar að hluta til innanbúðarfólki. Sumt af þessu fólki tók þátt í sukkinu og er því að greiða úr flækju og óreiðu sem það orsakaði sjálft eða átti að koma í veg fyrir. Fólk sem var í lykilstöðum við að svindla er núna kannski komið í lykilstöðu við að hylma yfir. Búið er að setja alla starfsmenn nýju bankanna, sem voru í gömlu bönkunum á athugunarlista. Hvers vegna skyldi það vera? Jú, menn óttast að þeir muni stunda svik. En það er ekki nóg að setja starfsmenn nýju bankana á athugunarlista. Starfsmenn gömlu bankanna þarf líka að vakta. En hver gerir það?
Loks hefur mér verið bent á, að endurskoðunarfyrirtækin munu vera með talsverða samvinnu sín á milli varðandi skoðun á sína á bönkunum. Ástæðan mun vera sú, að menn eru að reyna að átta sig á öllu fiffinu sem viðhaft var til að fela vafasamt hátterni og ekki síður vegna þess að þau í raun og veru vita ekkert hvernig eigi að bera sig að við svona skoðun. Að KPMG sé að skoða Glitni sé langt frá því það alvarlegasta sem er að gerast, enda KPMG stórt fyrirtæki og hver endurskoðandi innan fyrirtækisins í reynd eins og sérstakt fyrirtæki undir einni regnhlíf. Nei, það sé mun alvarlegra að stóru fyrirtæki eru með þetta víðtæka samstarf sína á milli.
Bloggar | Slóð | Facebook | Athugasemdir (11)
10.12.2008
Þingmenn bornir út
Bloggar | Slóð | Facebook | Athugasemdir (2)
10.12.2008
Sprengjuregn spillingar
Kastljós varpaði sprengjum í kvöld og fylgdi eftir ýmsu sem hefur verið að leka út, að nokkru leyti í fjölmiðlum en mest á bloggsíðum og í athugasemdum. Þótt ég og örugglega fleiri séum komin með upp í kok og meira til þakka ég Kastljóssfólkinu fyrir og hvet það til frekari dáða. Heldur vil ég halda áfram að fá dagleg áföll og að tekið sé á þeim en að þessi spillingarsori verði látinn viðgangast í laumi. Haldið áfram að grafa upp og segja frá, gott fólk!
Svo rífur þingflokksformaður Samfylkingarinnar kjaft við Atla Gíslason og segir að við höfum "lent í því" að bankakerfið hafi hrunið eins og það sé afsökun fyrir þeirri spillingu og þeim forkastanlegu vinnubrögðum sem viðgangast NÚNA við afskriftir skulda fyrirtækja, sölu þeirra sem Atli segir ólöglega, rannsóknir á gömlu bönkunum o.fl. o.fl. Umboðsmaður alþingis gagnrýnir og gagnrýnir en ríkisstjórnin hlustar ekki. Atli vitnaði í skýrslu Umboðsmanns og Lúðvík segir bara: "Hér er haldið áfram með ítrekaðar ásakanir"! Mér heyrðist Lúðvík vera steinhissa og undrandi á að það skuli ríkja mikil tortryggni í þjóðfélaginu. Hvaða rugl er þetta?
Laganefnd Lögmannafélags Íslands leggst gegn samþykkt frumvarps um rannsóknarnefnd vegna bankahrunsins eins og það var lagt fyrir Alþingi. Nefndin vill víðtækar og veigamiklar breytingar á frumvarpinu. Ýmsir lögmenn og fræðimenn í lögfræði hafa lýst áhyggjum yfir að lagasetning í kjölfar bankahrunsins hafi verið óvönduð og flaustursleg. Fjallað var um þetta og rætt við Evu B. Helgadóttur, formann laganefndar, í Speglinum. Hlustið, þetta er grafalvarlegt mál.
Enn og aftur kemur viðskipta- og bankamálaráðherra af fjöllum. Hann vissi ekki af rannsókn KPMG á viðskiptum gamla Glitnis sem staðið hefur yfir í tvo mánuði! Þó er Björgvin með einn aðstoðarmann og einn upplýsingafulltrúa í fullri vinnu á kostnað okkar við að upplýsa hann um menn og málefni og hefur fjölskyldutengsl inn í gamla Glitni. Ég held að Björgvin og allir hinir ráðherrarnir ættu að hlusta á það sem Birgir Hermannsson, stjórnmálafræðingur, sagði í Silfrinu á sunnudaginn um pólitíska ábyrgð. Ég klippti það sérstaklega út fyrir þau:
Ég legg svo til að fólk lesi t.d. þetta og þetta hjá Agli. Bloggið hans Egils Helgasonar er nauðsynleg lesning fyrir alla og þótt athugasemdirnar séu margar og æði misjafnar leynast þar gullmolar inni á milli. En horfið á Kastljósið ef þið eruð ekki búin að því. Ég er búin að horfa tvisvar og þetta er svo þétt efni og mikið af upplýsingum að ég þarf að horfa oftar.
Svo er fólk að hæðast að mótmælum og borgarafundum og þeim sem eru nógu gagnrýnir í hugsun til að vilja mótmæla svona vinnubrögðum. En það nennir ekki að mæta sjálft og ber fyrir sig veðri, ræðumönnum sem hugnast þeim ekki eða einhverjum ímynduðum hægri/vinstri stöðlum! Málið snýst bara ekki um það heldur að leggja sitt af mörkum, taka þátt í að mótmæla endalausri spillingu og óheiðarleika og krefjast umbóta. Þverpólitískar aðgerðir sem krefjast eingöngu nærveru okkar. Gerður Kristný og Stefán Pálsson ræddu um mótmæli í Íslandi í dag í gærkvöldi.
Bloggar | Breytt s.d. kl. 01:48 | Slóð | Facebook | Athugasemdir (21)
9.12.2008
Vek athygli á þessu...
og þessu (smellið í læsilega stærð)...
og þessu...
og í tengslum við það þessu...
Steingrímur J., Helgi Hjörvar og Guðjón Arnar sátu í salnum. Af þeim 63 sem við borgum laun og voru boðnir mættu semsagt 6 að Björgvin G. meðtöldum. Hvað ætli margir hafi mætt í árlegan kvöldverð Forseta Íslands á Bessastöðum 1. desember sl.? Eða var sparað í kreppunni og kvöldverðurinn sleginn af?
Viðbót: Gerið það svo fyrir mig að lesa þetta sem er stytt og endursagt héðan. Hugsið ykkur ef við hefðum svona mann í Seðlabankanum. Þvílíkur munur væri á ástandinu þá! Og hér eru mjög athyglisverðar niðurstöður skoðanakönnunar.
Bloggar | Breytt s.d. kl. 18:11 | Slóð | Facebook | Athugasemdir (7)
9.12.2008
Fjölmennur og heitur borgarafundur
Mikið vildi ég að borgarafundurinn í gærkvöldi hefði verið sendur út í beinni eins og sá síðasti. Mér finnst það eiginlega vera skylda RÚV, sjónvarps allra landsmanna, að gefa fólki um allt land kost á að vera með að svo miklu leyti sem það er hægt í gegnum sjónvarpið. Og öllum þeim, sem komast ekki út úr húsi einhverra hluta vegna. Það var ekki einu sinni útvarpað frá fundinum og það fannst mér aumt. Vonandi fjalla prent- og netmiðlar vel um fundinn. Þetta eru engar venjulegar aðstæður sem við búum við núna og fjölmiðlum ber skylda til að miðla því sem er að gerast til allra Íslendinga, heima og erlendis.
Þarna voru saman komnir nokkrir af helstu forystumönnum verkalýðsfélaga og eitthvað af lífeyrissjóðsforkólfum. Og einn ráðherra sem átti bágt, Björgvin G. Á honum stóðu ansi mörg spjót. En hann má eiga það að hann reyndi og svaraði einstaka spurningum afdráttarlaust. Eins og til dæmis því hvort Davíð Oddsson sæti ekki í Seðlabankanum í skjóli Samfylkingar alveg eins og Sjálfstæðisflokks. Því svaraði hann játandi. Og þegar hann var spurður hvað honum fyndist um að bankamálaráðherra og seðlabankastjóri hittust ekki né ræddust við í heilt ár. Björgvin sagði að auðvitað væri það fáránlegt. Hann fékk líka yfir sig nokkrar eftirlaunafrumvarpsgusur og getur varla hafa liðið mjög vel undir þeim ósköpum. Annars fékk ég á tilfinninguna að honum sé farið að ofbjóða - sem manneskju. Og skyldi engan undra. Annars er Gylfi Arnbjörnsson efni í stjórnmálamann af gamla skólanum, hann fór eins og köttur í kringum heitan graut og svaraði spurningum út og suður. Hitti aldrei í mark.
Fólk gaf upp við hvað launin þeirra eru miðuð. Aðeins Gunnar Páll hjá VR er með "markaðslaun" eins og hann orðaði það. Sem þýðir að á meðan lægsti taxti umbjóðenda hans er 140.000 er hann með um 1.700.000. Traustvekjandi verkalýðsforingi, eða hitt þó heldur. Auðvitað á að gera eins og Guðmundur Gunnarsson og náunginn frá Trésmíðafélaginu - þeirra laun miðast við taxta sem þeir semja um fyrir umbjóðendur sína. Mig minnir að fleiri hafi svarað í þeim dúr og þannig á það að vera.
Hrafn Magnússon, framkvæmdastjóri Landssambands lífeyrissjóða, sagði að lífeyrissjóðirnir hefðu ekki tapað jafnmiklu og talið var í fyrstu - en ekki gat hann gefið upp neinar prósentur. Svo sagði hann að Fjármálaeftirlitið hefði eftirlit með áhættufjárfestingum lífeyrissjóðanna og þá var hlegið dátt í salnum. Greinilega enginn sem treystir eftirlitinu því, enda hefur það brugðist hlutverki sínu hrapallega - en samt hefur engum verið vikið frá sem þar eru í forsvari. Skrýtið.
Ásta Rut Jónasdóttir og Vésteinn Gauti Hauksson voru frummælendur auk Gylfa ASÍ. Þau voru bæði fantagóð og bæði lögðu þau út af sínum persónulegu högum. Aðstæður þeirra eru svipaðar og hjá okkur öllum sem erum með verðtryggð húsnæðislán. Vésteinn og konan hans hafa ákveðið að taka hjónabandið og hamingjuna fram yfir þrældóm fyrir skuldahítina til æviloka og honum létti við að taka þá ákvörðun. Það eiga örugglega fleiri eftir að feta í fótspor þeirra. Sáuð þið viðtalið við hann í Kastljósinu í síðustu viku? Það er hér:
En RÚV var ekki alveg fjarri góðu gamni og fjallaði um fundinn í Kastljósi og Tíufréttum sem ég klippti saman. Ég bjóst alveg eins við að heyra eitthvað á þessa leið: "Mörg kunnugleg andlit voru á fundinum frá flokksráðsfundi Vinstri grænna..." í stíl við það sem Jóhanna Vigdís Hjaltadóttir sagði í kvöldfréttum Sjónvarpsins í fyrrakvöld. Ég stimplaði það inn og glotti við tönn. En fréttakonur kvöldsins féllu ekki í þá pólitísku áróðursgryfju.
Vonandi fáum við góðar frásagnir af fundinum í fjölmiðlum í dag. Þetta var mjög góður fundur að mörgu leyti og verður þess að fá vandaða umfjöllun. Þótt hann hafi ekki verið jafnfjölmennur og sá síðasti voru nálægt 1.000 manns þarna og mikil stemmning.
Bloggar | Breytt s.d. kl. 14:48 | Slóð | Facebook | Athugasemdir (35)
8.12.2008
Andskotinn hafi það!
Ég var að bisa við að sýna skilning og vera kúl þegar ég afsakaði þá sem mættu ekki á mótmælin á Austurvelli - af hvaða ástæðu sem það var. Reyna að átta mig á sinnuleysinu sem hefur valdið því að fjöldinn á Austurvelli hefur mest náð um 10.000 manns þótt ég viti fyrir víst að 90% þjóðarinnar er óánægð með ástandið og vildu gjarnan mæta - ef þeir bara nenntu því. Auðvitað eru ótalmargir löglega afsakaðir en samt... Ég er pirruð. Mótmæla- og borgarafundirnir eru ekki skemmtisamkomur þar sem hæfir að diskútera kynhneigð eða handapat fundarstjóra og klæðnað eða einstakar setningar ræðumanna. Á þá mætir fólk til að senda skilaboð frá þjóðinni til yfirvalda. Skilið?
Ætli það hafi verið fullt í Kringlunni og Smáralind? Eða Hagkaupinu hans Jóns Ásgeirs sem er svo rosalega góður strákur að ætla að lána fólki fyrir jólunum í hálft ár! Nennið þið að borga fyrir jólin fram í júní? Er víst að þið getið það? Viljið þið virkilega láta Jón Ásgeir njóta góðs af kannski síðustu aurunum ykkar áður en þið missið vinnuna eða íbúðina? Sáuð þið þetta?
Tvennt varð til þess að ég ákvað að skammast svolítið yfir sinnuleysinu - og ég nenni ekki að hlusta á kjaftæði um að ykkur líki ekki þetta eða hitt við fundina á Austurvelli eða borgarafundina - ræðumenn, fundarstjóra eða hvað sem fólk er að setja fyrir sig og hnýta í. Málið snýst nefnilega alls ekki um það heldur framtíð okkar allra, barnanna okkar og barnabarnanna - og það fólk sem rændi okkur aleigunni, ærunni og orðstírnum og ætlar að ræna því sem eftir er af landinu sjálfu og auðlindum þess. Yfir okkur hellast upplýsingar á hverjum einasta degi um fláræði, heimsku, lítilsvirðingu, glannaskap, kæruleysi, lygar, leyndarmál, spillingu, mútur, óheiðarleika og allt sem nöfnum tjáir að nefna - og hvað gerir fólk í því? Ekkert. Muldrar í barminn en tekur ekki þátt í að segja skoðun sína þótt ekki sé nema að sjá af klukkutíma í viku til að mæta á mótmælafund. Lætur aðra um að skipuleggja og mæta í þeirri von að kannski breytist eitthvað einhvern tíma. Ja, hérna! Er ekki kominn tími til að vakna?
Það verður borgarafundur í Háskólabíói í kvöld - aftur. Síðast var troðfullt og gott betur. Verður troðfullt aftur í kvöld? Ég ætla bara rétt að vona það! Vitið þið hvað á að fjalla um? Ekki, nei? Ég skal segja ykkur það - lífeyrissjóði og stéttarfélög. Þar eiga að sitja fyrir svörum mennirnir sem eiga annars vegar að sjá til þess að við fáum mannsæmandi laun og hins vegar mennirnir sem bera ábyrgð á því að lífeyrisþegar nútímans og framtíðarinnar - við - eru búnir að glata stórum hluta af aurunum sem þeir ætluðu að lifa á í ellinni. En þeir eru allir með roknalaun og hafa engar áhyggjur af okkur.
Mennirnir sem eiga að sjá til þess að við fáum mannsæmandi laun eru búnir að missa öll tengsl við umbjóðendur sína. Þeir hafa varla sést síðan efnahagshrunið varð fyrir rúmum tveimur mánuðum. Gylfi ASÍ tuðar um Björgvin og ESB en hefur ekkert sagt eða gert til að verja og vernda þá sem honum ber að vernda - launþega þessa lands. Hafa þeir tjáð sig um uppsagnirnar? Ekki svo ég viti.
Og þessi náungi, sem stýrir stærsta stéttarfélagi landsins, var með 1,7 milljónir á mánuði árið 2007. Sat í sukkstjórn Kaupþings, fékk hálfa milljón fyrir hvern fund og tók þátt í að fella niður ábyrgð á milljarðaskuldum starfsmanna Kaupþings sem þið þurfið nú að standa skil á. Hvað annað samþykkti hann fyrir 500 þúsund á fund? Eruð þið sátt við svona spillingu og slík ofurlaun manna sem klúðra málunum?
Hafið þið skoðað launaseðlana ykkar og séð hvað þið eruð að borga í lífeyrissjóð? Þið borgið 4% og launagreiðandinn borgar helmingi meira, eða 8%. Þetta eru allt YKKAR peningar, nóta bene. Og hvað gerðu þeir við þá, mennirnir sem áttu að varðveita þá fyrir ykkur þangað til þið þurfið á þeim að halda? Þeir stunduðu fjárhættuspil og töpuðu þeim!
Ég er einyrki, þ.e. sjálfstætt starfandi, ekki launþegi. Af hverjum 100 þúsund kalli þarf ég að borga 12.000 í lífeyrissjóð, bæði framlag launþega og atvinnurekanda. Þegar lögin voru sett ca. árið 2000 um að allir væru skyldugir til að borga í sameiginlega sjóði þá hringdi ég vítt og breitt til að athuga hvort ég mætti í staðinn leggja mín 12% inn á reikning í banka sem haft yrði eftirlit með. En nei, ég varð að borga í sameiginlegan sjóð en mér var frjálst að bæta við í séreignarsjóð - eins og ég hefði efni á að borga meira. Og nú hefur komið í ljós að lífeyrissjóðir landsmanna hafa ástundað áhættufjárfestingar og tapað stórum hluta af peningunum mínum. Kannski áttar fólk sig ekki á því hvað lífeyrissjóðirnir hafa tapað miklu af peningum þess, ég veit það ekki - en það eru miklir peningar. Ég þekki fólk sem hefur tapað milljónum og sér varla fram á að skrimta þegar það hættir að vinna - sem við þurfum öll að gera einhvern tíma.
Ég nefndi hér að ofan að það hefði verið tvennt sem varð til þess að ég ákvað að skammast svolítið. Annað var þessi flotti bloggpistill Baldurs McQueen, eðalbloggara. Hitt var þessi skopmynd Henrýs Þórs. Og hananú!
Eftir þennan reiðilestur er aðeins eitt eftir - að hvetja alla sem vettlingi geta valdið að fjölmenna á borgarafundinn í Háskólabíói í kvöld kl. 20 og heyra hvað forsvarsmenn verkalýðsfélaga og lífeyrissjóða hafa að segja um þátt sinn í hruninu og hvað þeir sjá fram undan. Þjarma að þessum fánaberum almennings sem hafa glatað sýn á tilgang þeirra félaga sem þeim er rausnarlega borgað fyrir að sinna. Þetta kemur okkur öllum við, andskotinn hafi það!
Bloggar | Slóð | Facebook | Athugasemdir (55)
7.12.2008
Silfur dagsins
Hér kemur Silfur dagsins með sérstakri kveðju til Íslendinga sem búsettir eru erlendis og virðast ekki geta horft á sjónvarpsstöðvarnar á netinu. Hvorki í beinni né eftir á. Gaman væri að vita hvað veldur þessu sambandsleysi og hvort það er mikið mál að ráða bót á því. En miðað við allan tölvupóstinn sem ég fæ frá þessum löndum okkar í útlöndum sem reyna að fylgjast með á þetta við um fólk víða um heim. Þeim bendi ég líka á þessa slóð.
Inn gægðist einn stjórnmálamaður, Sigurjón Þórðarson úr Frjálslynda flokknum og talaði um kvótamálin. Það þarf að ræða miklu meira um þau. Til dæmis hver á kvótann núna? Var hann ekki veðsettur í topp hjá bönkunum sem nú er búið að þjóðnýta? Er þá ekki kvótinn kominn í eigu þjóðarinnar aftur? Eða hvað?
Annars var þema þáttarins, ef þema skal kalla, spilling og sukk útrásarbarónanna og hvernig þeir blekktu markaðinn með því að stofna alls konar skúffufyrirtæki og beita klækjum og svikum til að draga sér æ meira fé. Jón Steinsson kallaði þetta réttilega þjófnað. Símaviðtalið við Jón Steinsson gekk því miður brösuglega en hann var góður og Jón Daníelsson talaði um áhugaverða hluti - hlustum vandlega.
Vettvangur dagsins 1 - Baldur, Agnes, Þóra Kristín, Birgir
Takið eftir ummælum Birgis um skilningsleysi á pólitískri ábyrgð
Vettvangur dagsins 2 - Sigurjón, Gerður Kristný, Einar Már
Óli Björn Kárason og bókin hans um FL Group. Ég vildi gjarnan lesa þessa bók og ég tek ofan fyrir þeim blaðamönnum sem bíða ekki eftir opinberum rannsóknum heldur rannsaka málin sjálfir. Vonandi gera það fleiri.
Símaviðtalið við Jón Steinsson gekk brösuglega en Egill náði honum aftur í restina.
Þeir Jón Daníelsson höfðu margt að segja sem allir ættu að hlusta á af athygli.
Í beinu framhaldi af málflutningi Jóns Steinssonar bendi ég á grein eftir hann í Fréttablaðinu sl. miðvikudag - hún er hér.
Bloggar | Breytt s.d. kl. 14:54 | Slóð | Facebook | Athugasemdir (24)
7.12.2008
Fámennt en góðmennt á Vellinum
Það var fámennara á Austurvelli í gær en undanfarna laugardaga og grassvæðin voru eitt forarsvað eftir frostið og þíðuna. Fækkunin kom ekki á óvart. Eftir því sem nær dregur jólum verður fólk æ uppteknara af smákökubakstri, innkaupum og öllu mögulegu sem tilheyrir jólaundirbúningnum. Svo er skólafólk í prófum og upplestri, allir mögulegir og ómögulegir viðburðir eru úti um allt, s.s. jólatónleikar Björgvins Halldórssonar, skólakórajólatónleikar, jólabasarar og þar fram eftir götunum. Flestir hafa bara helgarnar til að sinna hlutunum og það er bara gott að þeir geri það. Maður verður líka að gefa sér tíma til að sinna sér og sínu fólki þegar tækifæri gefst, svo ég tali ekki um fyrir jólin.
Ég hef enga trú á því að fólk trúi dúsum ríkisstjórnarinnar eða haldi, eftir allt sem hefur gengið á í vikunni, að ástandið sé eitthvað skárra en það er í raun. Held raunar að fæstir geri sér almennilega grein fyrir því hvað það er hrikalega slæmt og hrædd er ég um að það eigi eftir að versna til muna. Fólk vill bara ekki trúa því ennþá. Reiðin í þjóðfélaginu magnast hægt og sígandi en reiði er orkufrek og slítandi tilfinning
Í fréttum RÚV var athyglisverð umfjöllun um þátt bloggsins og netmiðla í lýðræðislegri umræðu í þjóðfélaginu. Talað var við Salvöru og Jónas, gamalreynda bloggara. Þau hafa alveg hárrétt fyrir sér og ég hef nefnt svipaða hluti í skrifum mínum nokkrum sinnum. Hengdi fréttina aftan við umfjöllun um mótmælin í gær.
Þetta viðtal við Björgvin G. Sigurðsson er harla merkilegt og þar kennir ýmissa grasa. Eftir að hafa hlustað á það spyr maður sig hvað Björgvin sé að gera í ríkisstjórn sem lætur kyrrt liggja hvernig seðlabankastjóri kemur fram við bankamálaráðherrann - ítrekað. Skilur það einhver? Þessu tengt t.d. hér.
Svo er hér mynd sem ég hnuplaði af netmiðli. Hvað er Ingibjörg Sólrún að gera á mótmælafundi á Austurvelli? Svarið er hér.
Bloggar | Slóð | Facebook | Athugasemdir (8)
6.12.2008
Góðar hugmyndir eru sígildar
Fyrir nokkrum dögum bárust mér skilaboð frá góðum bloggvini með hugmynd sem mér þótti fjári góð og lofaði að koma áleiðis. Ég gleymdi mér og er svolítið sein á ferðinni með hana, en gjörningurinn sem í henni felst er sígildur og á við jafnt framvegis sem í dag.
Hugmyndin er þessi: Flestir eiga gamla lykla sem þeir hafa ekki not fyrir, vita ekki að hverju þeir eru eða hafa gleymt því... semsagt - ónothæfa aukalykla. Hengjum lykil í band, t.d. jólaborða, mætum með lykilinn á Austurvöll kl. 15 á laugardögum og hengjum hann á norska jólatréð. Þetta er táknrænn gjörningur og verður æ táknrænni eftir því sem fleiri annað hvort gefast upp á að borga síhækkandi afborganir á verðtryggðum húsnæðislánum eða missa heimili sín. Skilum lyklunum!
Slíkur gjörningur, táknrænn sem hann er, væri mjög í ætt við þetta atriði Spaugstofunnar frá 22. nóvember sl.
Bloggar | Breytt s.d. kl. 13:25 | Slóð | Facebook | Athugasemdir (10)
6.12.2008
Hótanir Tortímandans
Bloggar | Slóð | Facebook | Athugasemdir (3)
6.12.2008
Stórmerkilegt viðtal
Nú hlýtur Samfylkingin að gera eitthvað í málinu. Ætli Össur mæti á Austurvöll kl. 15 í dag? Nógu er hann reiður. Og athyglisvert sem Geir segir að þeir Davíð hafi talað saman ótal sinnum um "þessi mál" - en samt gerðu þeir aldrei neitt.
Bloggar | Slóð | Facebook | Athugasemdir (19)
5.12.2008
"Þetta er hress karl...
...sem hefur nógu frá að segja og mikið til málanna að leggja." Þetta sagði einn viðmælendanna í myndbandinu hér að neðan meðal annars. Hjartað í mér sökk niður í maga. Er virkilega til "venjulegt" fólk sem hugsar ennþá svona eftir allt sem á undan er gengið? Athyglisvert en jafnframt svolítið óhugnanlegt. Fleiri svöruðu í svipuðum stíl en sem betur fer ekki allir.
Búið er að fjalla mikið um yfirlýsingar Davíðs og svör hans á fundi Viðskiptanefndar Alþingis í morgun. Varla er á það bætandi. Það er fróðlegt að skoða athugasemdir við bloggpistla um málið. Einhver (jir?) æðir um með athugasemdir til varnar Davíð og hrópar "einelti, einelti!". Friðrik Þór kallar sinn Hannes og segir honum að hætta að gelta.
Mér finnst svívirðing og hneisa að kalla kröfu almennings um að Davíð víki af sjónarsviðinu "einelti", einkum gagnvart þeim sem hafa upplifað raunverulegt einelti, þjáðst alla tíð og jafnvel stytt sér aldur vegna þess. Krafa um að embættismenn eða stjórnmálamenn beri ábyrgð á mistökum sínum og afglöpum getur aldrei verið annað en sanngjörn og einelti er hún svo sannarlega ekki. Því fleiri sem gera kröfuna bendir þvert á móti til þess að hún sé afar réttmæt.
Merkilegt sem haft er eftir Pétri Blöndal um að "...engin staðfesting hafi fengist á því að Davíð sé óvinsæll hjá þjóðinni...". Þetta bendir sterklega til þess að Pétur eigi hvorki sjónvarp né útvarp og varla er hann nettengdur heldur. Enda vísaði fréttamaðurinn strax í skoðanakönnun þar sem fram kom að 90% þjóðarinnar vill losna við Davíð. Aðspurður um endurkomu Davíðs í pólitík svarar Geir: "Ég óttast ekki neitt í þessu sambandi..." Óttast? Er ástæða fyrir hann að óttast ef Davíð kemur aftur? Já, líklega. Honum finnst það alltént eins og fram kemur.
Og að lokum davíðskur hroki hjá Geir þegar fréttamaður segir að á fundinum hafi Davíð gagnrýnt ríkisstjórnina harðlega fyrir að hlusta ekki á viðvaranir sínar (sem enginn í ríkisstjórninni vill reyndar kannast við). Geir svarar í davíðskum stíl: "Var það, já. Ég var ekki á fundinum. Varst þú á fundinum?" Flott, Geir! Annars hrutu gullkornin út úr Geir á færibandi, tókuð þið eftir því?
En hvað sem þið gerið í dag - gefið ykkur tíma til að hlusta á pistil Eiríks Guðmundssonar í Víðsjá í gær. Hann er hér - kemur strax á eftir kynningu og yfirliti yfir efni þáttarins. Er líka í tónspilaranum merkt: Víðsjá - Draumur eða martröð...
Bloggar | Breytt s.d. kl. 02:24 | Slóð | Facebook | Athugasemdir (27)
4.12.2008
Frekjan, hrokinn og firringin
Þessi frétt var á mbl.is í gær undir fyrirsögninni: "Frekja og hroki aðgangsorð íslenska helvítisins". Meðal þeirra sem tengdu bloggfærslu við hana var Dofri og rifjaði hann þar upp frétt og viðtal frá september 2007. Viðtalið sem Dofri benti á var við Hannes Hólmstein Gissurarson og það er hreinlega dæmalaust.
Í viðtalinu við Hannes Hólmstein kemur fram að honum finnst mjög æskilegt að sem flest sé í einkaeigu eins og nýfrjálshyggjutrúin býður, meira að segja orkufyrirtækin okkar. Hann mærir útrásarvíkingana og vill bara selja allt klabbið. Skömmu eftir að viðtalið var tekið fór REI-málið að koma upp á yfirborðið. Og hvað er ekki að gerast með Hitaveitu Suðurnesja þessa dagana? Hún var einmitt einkavædd að hluta og Hannes Friðriksson fylgist með því sem nú er í farvatninu þar og hverjir standa þar að baki.
Hér er þetta magnaða viðtal við Hannes Hólmstein frá 13. september 2007. Hann ræður sér ekki fyrir hrifningu á því hve mikið og hratt bankakerfið stækkaði. Hvernig sem á því stendur situr hann ennþá í stjórn Seðlabankans, besti vinur hans er aðalbankastjórinn og margir trúbræður hans og lærlingar eru valdamiklir í stjórnkerfinu, t.d. þingmenn, ráðherrar og borgarfulltrúar. Hafa þeir nokkuð gengið af trúnni? Ég hef ekki orðið vör við það.
Þessar fréttir eru frá sama tíma, 13. og 15. september 2007. Hér getum við rifjað upp sýnishorn af því sem bankarnir eyddu loftbólupeningunum í, sem og sparifé Íslendinga og útlendinga. Það mun hafa verið um mitt árið 2007 að erlend millibankalán fengust ekki lengur og þá tóku bankasnillingarnir upp á því að draga sparifjáreigendur m.a. í Bretlandi, Hollandi, Belgíu og Þýskalandi á asnaeyrunum og hirða af þeim aurana þeirra. Lagt var að íslenskum sparifjáreigendum að millifæra sparnað sinn í ýmiss konar sjóði sem frægt er orðið og þeir rýrnuðu verulega. Í fréttinni er bara eitt sýnishorn af því hve hátt var lifað fyrir annarra manna peninga. Það er dýrt að temja sér svona lífsstíl. Þetta var ein af mörgum hliðum á íslenska efnahagsundrinu sem Hannes Hólmsteinn var svo hrifinn af. Ætli hann sé það ennþá?
Bloggar | Breytt s.d. kl. 02:04 | Slóð | Facebook | Athugasemdir (23)
3.12.2008
Heitir þetta ekki þjófnaður á mannamáli?
Það er búið að ræna almenning á Íslandi aleigunni og ærunni í ofanálag en þjófarnir ganga enn lausir. Þetta vita allir en stjórnvöld lyfta ekki litlafingri til að góma þá - þótt þau viti nákvæmlega hverjir þeir eru - því það má ekki "persónugera vandann" og alls ekki stunda "nornaveiðar". Þau orð hljóta að verða töm á tungu lögmanna framtíðarinnar í dómsölum landsins þegar verja á Jón eða Gunnu fyrir að hafa hnuplað blóðmörskepp úr Bónus eða brotist einhvers staðar inn og stolið öllu steini léttara. Því auðvitað má alls ekki persónugera vandann. Hvað þá stunda nornaveiðar.
Þetta myndband er úr Kastljósi í gærkvöldi. Ef mér skjöplast ekki heitir þetta einfaldlega þjófnaður - og hann er ekki af smærri sortinni þessi.
Bloggar | Slóð | Facebook | Athugasemdir (22)
3.12.2008
Össur finnur nýja auðlind
Henrý Þór Baldursson heitir ungur maður, nýbakaður faðir (til hamingju!), með beittan, gagnrýninn húmor sem hann tjáir með skopmyndum á bloggsíðu sinni og á Smugunni.
Á þessari skopmynd er Össur að kynna nýja auðlind - hugmynd um hvernig hægt er að fela Ísland með því að breyta nafninu í frægt vörumerki - sem sagt, selja landið sem er einmitt það sem Össur hefur prédikað mjög grimmt undanfarið. Nema hvað hann vill selja það erlendum álrisum, ekki gosdrykkjaframleiðanda. Hvernig líst fólki á að breyta nafni Íslands í Alcoa? Fleiri hugmyndir, einhver? Hjálpum Össuri.
Bloggar | Breytt s.d. kl. 12:52 | Slóð | Facebook | Athugasemdir (6)
2.12.2008
Ákall frá Herði Torfasyni
Mér heyrist að Hörður Torfason sé á góðri leið með að verða þjóðhetja. Hann hefur nú staðið fyrir og stjórnað mótmælafundum á Austurvelli 8 laugardaga í röð. Fáir gera sér grein fyrir allri vinnunni sem er á bak við skipulagninguna. Þetta hefur verið full vinna hjá Herði og heimili hans undirlagt, svo og sími hans og tími. Hörður er hugsjónamaður af bestu sort.
Hörður hefur nú fengið afnot af húsnæði að Smiðjuvegi 72 í Kópavogi með það fyrir augum að nota það til fundarhalda, hafa þar aðstöðu fyrir fólk sem vill bretta upp ermar, láta til sín taka og skipuleggja framtíðina. Í þessu skyni hefur Hörður stofnað félagið Raddir fólksins og er að opna heimasíðuna raddirfolksins.org, sem er í vinnslu. Hann hefur líka stofnað bankareikning í nafni félagsins þar sem fólk og fyrirtæki geta lagt sitt af mörkum - bankareikningurinn er: 1132-05-415000 og kennitalan er 571108-0540.
En fleira þarf til. Í húsnæðið á Smiðjuvegi vantar t.d. tölvur, skrifborð, skrifborðsstóla, hillur, kaffi- og meðlætisgræjur, eldhúsáhöld, ísskáp... allt mögulegt. Ef einstaklingar eða fyrirtæki eru að endurnýja hjá sér eða með fullar geymslur af ónotuðum hlutum sem gætu nýst á Smiðjuveginum væri mjög vel þegið að láta Hörð vita af því. Hann sækir ef með þarf. Síminn á Smiðjuveginum er 618 0888.
Og síðast en ekki síst vantar fólk til alls konar starfa. Til að byrja með verður opið frá kl. 14 til 18 og fólk er hvatt til að mæta og/eða hafa samband.
Bloggar | Breytt 3.12.2008 kl. 12:51 | Slóð | Facebook | Athugasemdir (55)